“Malika” bozori va “Beldersoy oromgohi”dagi davlat ulushi sotildi. Bu haqida Davlat aktivlarini boshqarish agentligi matbuot xizmati xabar berdi. 

Tegishli xususiylashtirish dasturiga ko‘ra, No’kis vinozavodi ustav kapitalidagi 51,0 foiz ulushni xususiylashtirish ko‘zda tutilgan.

Shunga ko‘ra, Davlat aktivlarini boshqarish agentligi huzuridagi UzAssets investitsiya kompaniyasi mazkur jamiyat ustav kapitalidagi aksiya paketini Qarataw sawda bazasi’ga 17,5 milliard so‘m xarid qiymati hamda 3,4 million dollar miqdorida investitsiya kiritish sharti bilan sotilgani to‘g‘risida bayonot bergan.

Ta’kidlanishicha, Davlat tender komissiyasining tegishli qaroriga muvofiq quyidagi davlat ko‘chmas mulk obyektlarining ommaviy savdo jarayonlari g‘oliblari belgilangan.
Xabarda keltirilishicha, “Poytaxt biznes majmuasi” MCHJ mulkiy majmuasi bo‘yicha savdolarda Quadro IH DMCC (BAA) kompaniyasi 164,0 mililard so‘m xarid qiymatini bir yo‘la to‘lash hamda ta’mirlash-tiklash ishlari uchun 6,0 million dollardan kam bo‘lmagan miqdorda investitsiya kiritish sharti bilan sotilgan.

Shuningdek, “Malika” savdo va maishiy xizmat ko‘rsatish majmuasi bo‘yicha savdolarda Premium Prime Service MCHJ 125,0 milliard so‘m xarid qiymatini bir yo‘la to‘lash hamda ta’mirlash-tiklash ishlari uchun 100,0 milliard so‘m miqdorida investitsiya kiritish va 250 ta yangi ish o‘rinlarini yaratish sharti bilan sotilgan.

Bundan tashqari, “Beldersoy oromgohi” dam olish maskani (Kanat yo‘li bilan birga) bo‘yicha savdolarda Ulkan Mulk MCHJ 107,0 milliard so‘m xarid qiymatini bir yo‘la to‘lash sharti bilan savdo g‘olibi deb topilgan.

Qayd etilishicha, O‘zbekiston Prezidentining 2020-yil 27-avgustdagi farmoni talablariga ko‘ra, “Chorvoq” turistik-rekreatsion zonasi direksiyasi hududida amalga oshiriladigan loyihalar Direksiya bilan kelishilgan holda amalga oshiriladi.

Shuningdek, daraxt va butalarning kesilishiga joriy etilgan moratoriy talablariga rioya qilinadi.

• Bozor
• Davaktiv