Kinematografiya agentligi direktori o‘z lavozimining vakolatlaridan foydalangan holda “Sevimli” foydasini ko‘zlab byudjetdan pul ajratgani tasdiqlangandan so‘ng O‘zbekiston elektron ommaviy axborot vositalari milliy assotsiatsiyasi raisli lavozimidan ozod qilingan edi. Ammo bugun, 31-yanvar kuni Firdavs Abduxoliqov prezident qarori bilan Madaniyat va turizm vazirligi huzuridagi Kinematografiya agentligi direktori lavozimiga qayta tayinlandi. Xoʻsh, qaysidir amaldorni vazifasidan ozod qila turib, oradan biroz vaqt oʻtgach, u bilan bogʻliq voqealar unutila boshlagach, uni lavozimga qayta tayinlash qanchalik toʻgʻri?

O‘zi Firdavs Abduxoliqov nimada ayiblangan edi?

O‘zbekiston Kinematografiya agentligi “Sevimli” telekanaliga davlat buyurtmalarini berib kelgani, shuningdek, subsidiyalar ajratishda manfaatlar to‘qnashuviga yo‘l qo‘yilgani ehtimoli bo‘yicha Korrupsiyaga qarshi kurashish agentligining o‘rganish natijalariga ko‘ra, Kinematografiya agentligi direktori va bir vaqtning o‘zida subsidiya mablag‘larini taqsimlash bo‘yicha qarorlar qabul qilish vakolatiga ega Badiiy kengash raisi – Firdavs Abduxoliqov subsidiya mablag‘larining taqsimlanishi va kontragentni tanlash jarayonida yaqin qarindoshlari benefisiar bo‘lgan (ta’sischilari: Sharapova F.S. - Firdavs Abduxoliqovning turmush o‘rtog‘i 70 foiz, Rashidova A.F. - Firdavs Abduxoliqovning qizi 20 foiz, Abduxalikov A.F. - Firdavs Abduxoliqovning o‘g‘li – 10 foiz) “Master Media Production and Broadcast” MCHJ bilan manfaatlar to‘qnashuviga ega bo‘lsa-da, bu holatni bartaraf qilish choralarini ko‘rmasdan, mazkur jamiyat manfaatlarini yoqlab ovoz berishda va qarorlar qabul qilish jarayonida bevosita ishtirok etgan.

Masalan, 2021-yilning o‘zida Kinematografiya agentligi tomonidan berilgan davlat buyurtmalari asosida “Sevimli” telekanali (“Master Media Production and Broadcast” MCHJ) ishtirokida “Orzular palatasi” va “Tuzoq” seriallari suratga olingan.

Jumladan, 2021-yilning 22-fevral kuni Kinematografiya agentligi, “Master Media Production and Broadcast” MCHJ hamda “MY-FILMS” MCHJ o‘rtasida “Orzular palatasi” milliy serialini suratga olish maqsadida qiymati 3,0 mlrd so‘mlik shartnoma imzolanib, Kinematografiya agentligi tomonidan 1,5 mlrd so‘m pul mablag‘lari “MY-FILMS” MCHJ hisob raqamiga o‘tkazib berilgan.

Bundan tashqari, Kinematografiya agentligi hamda “Master Media Production and Broadcast” MCHJ o‘rtasida “Tuzoq” milliy serialini suratga olish uchun 2021-yilning 18-may kuni jami qiymati 1,8 mlrd so‘mlik ikki tomonlama shartnoma (dxarid.uz to‘g‘ridan-to‘g‘ri shartnoma orqali) imzolangan va 1,8 mlrd so‘m pul mablag‘lari jamiyat hisob raqamiga o‘tkazib berilgan.

Shunga ko‘ra, mazkur holatlarda O‘zbekiston Respublikasi Kinematografiya agentligi bosh direktori Firdavs Abduxoliqov yaqin qarindoshlari ta’sischiligidagi MCHJning manfaatlarini ko‘zlab, davlat byudjetidan juda ko‘p miqdordagi pul mablag‘larining ajratilishiga erishib, qonunbuzilishi holatlariga yo‘l qo‘ygan.

Korrupsiyaga qarshi kurashish agentligi tomonidan o‘rganish natijalari bo‘yicha to‘plangan hujjatlar qonuniy chora ko‘rish uchun Bosh prokuraturaga yuborilgan.

Ha shuncha aniq dalillar bilan ishdan olingan bo‘lsa ham ya’na lavozimga qayta tayinlanishi qanchalik to‘g‘ri yoki noto‘g‘ri ekanligini biz hal qilmaymiz. Buning javobini yaxshisi o‘zingizga qoldiramiz.

• Firdavs Abduxoliqov