Bugun, 22-dekabr kuni Xalq deputatlari Romitan tumani Kengashining navbatdan tashqari sessiyasi o‘tkazildi. Unda viloyat hokimi Botir Zaripov ham ishtirok etdi.

Tashkiliy masala ko‘rilgan sessiyada Romitan tumaniga Umidjon Isoyevich Barnoyev hokim etib tayinlandi. 

Bungacha tumanga hokim bo‘lgan Xurshid Tohirov esa boshqa ishga o‘tkaziladigan bo‘ldi.

Ma’lumot uchun, Umidjon Barnoyev 1970 -yil 12-iyulda Romitan tumanida tug‘ilgan. Ma’lumoti oliy. 1996-yilda Buxoro Oziq-ovqat va yengil sanoat texnologiyasi (hozirgi Buxoro muhandislik-texnologiya) institutini hamda 2000-yilda Samarqand davlat universitetini tamomlagan. Ma’lumoti bo‘yicha mutaxassisligi – muhandis-mexanik, huquqshunos. 

Mehnat faoliyatini 1998-yilda Buxoro viloyati Adliya boshqarmasida sud ijrochisi sifatida boshlagan. Faoliyati davomida Toshkent shahar prokuraturasi huzuridagi Soliq, valyutaga oid jinoyatlarga va jinoiy daromadlarni legallashtirishga qarshi kurashish departamenti xodimi (2004−2013), “O‘zpaxtasanoat” aksiyadorlik jamiyati yuridik boshqarmasi huquqshunos maslahatchisi (2018) sifatida ishlagan.

2018−2020-yillarda esa “Safari Vogue” innovatsion turizm klasteri direktor o‘rinbosari, 2020-yildan mazkur MChJning bosh direktori lavozimida ishlagan.

U ayni paytga qadar Buxoro tumani hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari lavozimida ishlab kelayotgan edi. 

Eslatib o‘tamiz, Umid Barnoyev turli yillarda Bosh vazirning agrar va oziq-ovqat sohalarini rivojlantirish masalalari bo‘yicha o‘rinbosari hamda Buxoro viloyati hokimi lavozimlarida ishlagan O‘ktam Barnoyevning ukasi hisoblanadi.

• Buxoro
• hokim