Kecha, 17-yanvar kuni DSQ raisi Sherzod Kudbiyev bilan bo‘lib o‘tgan matbuot anjumanidan so‘ng jamoatchilik o‘rtasida Artel kompaniyasiga Hukumat tomonidan alohida imtiyozlar qo‘llanilayotgani haqida xabarlar tarqaldi.

Bunga matbuot anjumanida DSQ raisining soliq imtiyozlari haqidagi savolga davlat fiskal va moliya siyosati doirasida qaysidir sohalarni rivojlantirish uchun imtiyozlar berilishi haqidagi gapi sabab bo‘lgan.  

Bir muddat o‘tib, Artel kompaniyasi Matbuot xizmati ham muhokamaga qo‘shilib, o‘z munosabatini bildirdi.

Kompaniyaga ko‘ra, ayni paytda tizim korxonalarida 10 mingdan ziyod ishchi-xodimlar faoliyat yuritadi. Ularning 2021-yil uchun yillik daromadi 386 mlrd. so‘mdan oshgan.

Shuningdek, 2020-yil uchun kompaniya 630 mlrd. so‘m miqdorida soliq va majburiy to‘lovlarni to‘lagan. 2021-yilda esa davlat va mahalliy byudjetga 699 mlrd. so‘mdan ortiq soliq va bojxona to‘lovlarini amalga oshirgan.

“2022-yildagi soliq qonunchiligidagi o‘zgarishlar natijasida Artel kompaniyasi uchun mol-mulk soliq hisoblash bazasi 2.1 barobarga ortdi”, – deyiladi kompaniya xabarida.

Kompaniya matbuot xizmati, shuningdek, elektrotexnika sohasini rivojlantirish maqsadida imzolangan 2021-yil 2-martdagi 5011-sonli prezident qarorida nazarda tutilgan imtiyozlardan O‘zeltexsanoat tarkibiga kiruvchi va elektrotexnika sanoatining barcha ishlab chiqaruvchilari “teng huquqda foydalanayotgani”ni bildirgan.

• Artel
• Ortiqxo‘jayev
• Toshkent