Kecha, 2-avgust kuni O‘zbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligida bo‘lib o‘tgan brifingda, Raqobat qo‘mitasi raisi o‘rinbosari Farrux Karabayev Avtomobillarga gaz to‘ldirish stansiyalarida sotilayotgan metan va suyultirilgan (propan) gaz narxlarini barqarorligini ta’minlash maqsadida qo‘llaniladigan nazorat mexanizmlari yuzasidan ma’lumot berib o‘tgan.

Aniqlanishicha, qo‘mita tomonidan respublika bo‘yicha 1450 ta gaz to‘ldirish shoxobchalarida sotilayotgan metan gazining chakana narxlarining dastlabki tezkor monitoringi o‘tkazilgan va uning natijalariga ko‘ra, gaz to‘ldirish shoxobchalarining 71 foizida (1 064 ta holatda) 3 750 so‘m narxlar saqlanib qolayotganligi, 25 foizida (370 ta holatda) narxlar 3800-3950 so‘mgacha tashkil etganligi aniqlandi, qolgan 4 foizi ish faoliyatida emasligi ma’lum bo‘lgan.

Bugungi kunda, metan gazi narxlarining keskin oshishiga sabab bo‘luvchi omillar mavjud emasligi aniqlangan.

O‘z navbatida, Raqobat qo‘mitasida gaz to‘ldirish shoxobchalari o‘rtasidagi kelishib qilingan harakatlar yoki o‘z ustun muzokara kuchini suiiste’mol qilish natijasida narxlarni asossiz oshirish holatlari aniqlanganda, ushbu xo‘jalik yurituvchi subyektlarga nisbatan narxlarni tushirish bo‘yicha majburiy ko‘rsatmalar beriladi hamda moliyaviy jarimalar qo‘llanilishi mumkin.

Bundan tashqari, propan gazi mahsuloti narxlari o‘rganilganda 20 foiz gaz to‘ldirish shoxobchalarida narxlar 5500 so‘mni, 65 foizida 5500-6000 so‘m oraliqda ekanligi, 5 foizi 6500 so‘m va 10 foizi ish faoliyatida emasligi aniqlangan.

Shu bilan birga, qo‘mita tomonidan birja savdolarida propan mahsulotining narxlariga ta’sir etuvchi omillar o‘rganilmoqda va ishlab chiqaruvchilar tomonidan narx manipulyatsiyalari va boshqa raqobatga zid harakatlar aniqlanganda ularga nisbatan ta’sirchan huquqiy choralar qo‘llanilishi ta’kidlangan.

• Gaz
• Gaz shaxobchasi