Ayni kunlarda mamlakatimizda mo‘tadil havo harorati kuzatilmoqda. Bu esa energetika tizimining bir maromda ishlashida muhim ahamiyat kasb etadi.

AOKAda o‘tkazilgan brifingda Energetika vazirligi matbuot xizmati rahbari Hasan Toshxo‘jayev bayram kunlari, ya’ni 31-dekabr-2-yanvar kunlari ushbu tizim faoliyati bo‘yicha ma’lumot berdi.  

Unda qayd etilishicha, soha korxonalari tomonidan 670,6 million kVt/soat elektr energiyasi ishlab chiqarilgan. Iste’molchilarga 624,2 million kVt/soat elektr energiyasi yetkazib berilgan. Respublikada tabiiy gaz iste’moli 446 million metr kubni tashkil qilgan.  

Ushbu vaqt oralig‘ida tizimda yirik avariyalar hamda favqulodda hodisalar ro‘y bergani yo‘q. Barcha tizim tashkilotlarida 24 soatlik tunu kun navbatchilik yo‘lga qo‘yilib, maxsus brigadalar elektr energiyasi va gaz ta’minotida yuzaga kelgan nosozliklarni zudlik bilan bartaraf etgan.  

– Kecha, 3-yanvar kuni esa elektr stansiyalar orqali jami 234,1 mln. kVt/soat elektr energiyasi ishlab chiqarilib, iste’molchilarga 219,8 mln. kVt/soat elektr energiyasi yetkazib berildi. Buning uchun issiqlik elektr stansiyalarida 47,4 mln. kubometr tabiiy gaz, 20,6 ming tonna ko‘mir hamda 2,4 ming tonna mazut yoqildi. Respublika tabiiy gaz iste’moli 3-yanvar kuni 150,8 mln. kubometrni tashkil qildi. Aholi va ijtimoiy soha obyektlarini birinchi navbatda tabiiy gaz bilan ta’minlash hamda quvurlardagi bosimni bir me’yorda tutib turish maqsadida metan zapravkalarga kiritilgan cheklovlar olib tashlandi. Barcha hududlardagi avtomobillarga gaz to‘ldirish kompressor shoxobchalarning ish faoliyati mahalliy hokimliklar tomonidan tasdiqlangan reja-grafik asosida tizimli ravishda yo‘lga qo‘yilmoqda. Kecha mamlakatimizdagi jami 1 ming 507 ta metan zapravkaning 1 ming 363 tasi, ya’ni 91 foizi to‘liq ish faoliyatida ishlagan , – degan H. Toshxo‘jayev.  

Brifingda avtobenzin va dizel yonilg‘isi talabni qoplaydigan darajada yetkazib berilayotgani ham ta’kidlandi. Unga ko‘ra, 3-yanvar kuni “O‘zbekneftgaz” aksiyadorlik jamiyati tomonidan mamlakatimizdagi barcha avtomobillarga yonilg‘i quyish shoxobchalariga jami 2 ming 607 tonna avtobenzin yetkazilgan. Shuningdek, avtomobillarga gaz to‘ldirish kompressor shoxobchalariga 12,1 mln. metr kub tabiiy gaz hamda 600 tonna suyultirilgan gaz yetkazib berildi.  

Elektr qurilmalari va gaz ta’minotida yuzaga kelgan nosozlik o‘z vaqtida bartaraf qilinmoqda.  

• AOKA
• Energetika_vazirligi
• Gaz