MIB 3 ming nafardan ko‘proq qarzdorni qidirmoqda. Ularning bir qismi chet elga chiqib ketgan.

Qidiruvdagi shaxslar topilishi natijasida umumiy miqdorda 30 mlrd 700 mln so‘m mablag‘, shu jumladan, 22 mlrd 800 mln so‘m miqdordagi aliment pullari undirilishi rejalashtirilgan.

O‘zbekiston Respublikasi “Sud hujjatlari va boshqa organlar hujjatlarini ijro etish to‘g‘risida”gi qonunga binoan  Majburiy ijro byurosining davlat ijrochilari tomonidan qarzdor shaxs va uning mol-mulki turgan joyi haqida ma’lumotlar bo‘lmaganda, ularni qidirish to‘g‘risida qaror qabul qilinadi. Byuro organlari tomonidan amalga oshirilgan tezkor-qidiruv faoliyat natijasida joriy yilning o‘tgan davrida qarzdorligi tufayli jami 7,8 mingdan ziyod jismoniy shaxsga qidiruv e’lon qilingan bo‘lib, shundan 4,5 ming nafardan ortig‘i topilib, ijro ishlari o‘tkazilgan.

Hozirda 3 264 nafar qarzdor qidirilmoqda, ushbu shaxslarning 2 149 tasi respublika hududida yashirinib yurganligi, 1 115 tasi esa, chet elga turli maqsadlarda chiqib ketganligi aniqlangan.

Shuningdek, joriy yilda qidiruv e’lon qilingan 4 232 ta avtotransport vositalarning 3 073 tasi, ya’ni 73 foizi tezkor tadbirlar natijasida topilgan va qolgan 1 149 ta avtotransport vositalarini topish bo‘yicha  qidiruv jarayonlari davom etmoqda.

Shu boisdan, umumiy miqdorda 40 mlrd 500 mln qarzdorlik undirilishi qayd etilgan.

• MIB