Finstar holdingi asoschisi, milliarder Oleg Boyko Google’ga qarshi Moskva sudida g‘olib chiqdi. Ma’lumotni Forbes’ga tadbirkorning o‘zi tasdiqlagan. 

Boykoning aytishicha, uning da’vosi biznesga zarar yetkazish yoki shunchaki shantaj qilish maqsadida anonim saytlarda qasddan joylashtirilgan noto‘g‘ri ma’lumotlardan foydalanishga qarshi qaratilgan.

“Ushbu da’vo Google’ga qarshi emas, balki bunday suiiste’mollarga qarshi qaratilgan edi, sud buni qanoatlantirdi. Biz Google uchun hech qanday javobgarlikni talab qilmadik”, — degan Oleg Boyko.

Milliarderning advokati Vadim Proxorovning aytishicha, Boykoning Google’ga qarshi da’vosi “haqiqatga to‘g‘ri kelmaydigan va ko‘pincha g‘alati ma’lumotlarni joylashtirgan” anonim sayt bilan bog‘liq bo‘lgan.
“Masalan, bir materialda 1997-yil Osiyo bozorlarida boshlangan inqiroz uchun shaxsan Oleg Boyko aybdor bo‘lgan”, — deya ta’kidlagan. 

Advokatning so‘zlariga ko‘ra, sud Google kompaniyasiga “Oleg Boyko” so‘rovi bo‘yicha qidiruv natijalarini ko‘rsatayotganda ushbu saytga havola bermaslikni buyurgan.

Xabarda berilishicha, Forbes Oleg Boykoning boyligini 1,3 milliard dollarga baholagan. Boyko DFI va 4finance fintech kompaniyalari, Ritzio International o‘yini va “Riv Gosh” parfyumeriya tarmog‘ini boshqaradigan Finstar holdingiga egalik qiladi.

• Google
• Sud