O‘zbekiston Respublikasi Prezidenti Shavkat Mirziyoyev Qozog‘iston Respublikasi mustaqilligiining 30 yilligi munosabati bilan mamlakat Birinchi Prezidenti - Elboshi Nursulton Nazarboyev va Prezident Qasim-Jomart Toqayevga qutlovlar yo‘llab, ularga va qardosh Qozog‘iston xalqiga o‘zining eng ezgu tilaklarini bildirdi.

Maktublarda o‘tgan davr mobaynida mamlakatda barqaror o‘sishni ta’minlashga qaratilgan tizimli va keng qamrovli islohotlar natijasida bugungi kunda do‘st Qozog‘iston davlati barcha sohalarda yuksak taraqqiyotga erishayotgani qayd etilgan.

“Asrlar davomida xalqlarimiz o‘rtasida davom etib kelayotgan o‘zaro ahillik, do‘stlik va yaxshi qo‘shnichilik munosabatlari so‘nggi yillarda yanada mustahkamlanib borayotgani bizni ayniqsa quvontiradi”, deb ta’kidlagan Shavkat Mirziyoyev.

O‘zbekiston rahbari o‘z maktubida, shuningdek, joriy yil 5-6-dekabr kunlari Qozog‘istonga amalga oshirilgan davlat tashrifi davomida kechgan ochiq va sermahsul muzokaralarni alohida qayd etgan.

Shu bilan birga ittifoqchilik munosabatlari to‘g‘risida imzolangan deklarasiya, samarali muloqot mexanizmlarini yaratish tashabbuslari, qator yirik qo‘shma loyihalar bo‘yicha erishilgan muhim kelishuvlar, kelgusi yilning O‘zbekistonda Qozog‘iston yili deb e’lon qilinishi, yaqin do‘stlik, yaxshi qo‘shnichilik va strategik sheriklik ruhidagi aloqalarni sifat jihatidan mutlaqo yangi bosqichga olib chiqishi ta’kidlangan.

Maktublar yakunida Elboshi Nursulton Nazarboyev va Prezident Qasim-Jomart Toqayevga sihat-salomatlik, tuganmas kuch-quvvat va yangi zafarlar, birodar Qozog‘iston xalqiga esa tinchlik-omonlik, farovonlik, baxtu-saodat va doimiy taraqqiyot tilaklari izhor etilgan.

• O‘zbekiston
• Prezident
• Qozog‘iston