5-mart kuni vafot etgan mashhur vayner o‘limi bo‘yicha o‘rganishning dastlabki natijalari ochiqlandi. Sog‘liqni saqlash vazirligi boshqarma boshlig‘i Jaloliddin Asomiddinovning ma’lum qilishicha, o‘tkazilgan laborator tahlillar va MSKT tekshiruvlaridan so‘ng unda burun to‘sig‘ining qiyshayishi, gaymor bo‘liqlari giperplaziyasi, o‘rta va pastki burun chig‘anoqlari giperplaziyasi aniqlangan.

Shundan so‘ng bemorning roziligi bilan unda tegishli jarrohlik amaliyoti o‘tkazilgan. Fuqaroga rinoseptoplastika amaliyoti uchun endotraxeal narkoz berilgan. Biroq operatsiya davrida marhumning ahvoli to‘satdan yomonlashgan. Olib borilgan intensiv va reanimatsion davo choralariga qaramasdan joriy yil 5-mart kuni soat 03:22 lar chamasi unda biologik o‘lim qayd etilgan.

Asomiddinovga ko‘ra, ayni paytda tekshiruvlar olib borilayotgani sababli “Star Med Center” klinikasi faoliyati vaqtincha to‘xtatilgan. Shuningdek, Sog‘liqni saqlash vazirligi tegishli organlar bilan birgalikda fuqaro Farhod Mannopov vafoti yuzasidan belgilangan tartibda o‘rganish ishlari olib bormoqda.

Eslatib o‘tish mumkin, bir necha kun avval “Mitti vayn” taxallusi bilan ijod qilgan bloger Farhod Mannopov cho‘milayotganda boshini basseyn devoriga urib olib, burni singan, shundan so‘ng operatsiya stoliga yotgan va oqibatda komaga tushib qolib, vafot etgan edi.

6-mart kuni uning vafoti yuzasidan Jinoyat kodeksining 116-moddasi (Kasb yuzasidan o‘z vazifalarini lozim darajada bajarmaslik) tegishli bandlari bilan jinoyat ishi ochilgani ma’lum qilingan.

• Mittivine
• O'lim