Mo‘g‘uliston poytaxti Ulan-Batorda uchinchi kundirki ommaviy norozilik namoyishlari bo‘lib o‘tmoqda.

Namoyish ishtirokchilari mansabdor shaxslarni korruptsiyada va Mo‘g‘uliston byudjeti uchun eng katta daromad manbai bo‘lgan ko‘mir yetkazib berish bilan firibgarlikda ayblamoqda.

Dushanba kuni(5-dekabr) namoyishchilar hukumat binosiga bostirib kirishga uringan, biroq keyin ixtiyoriy ravishda shaharning markaziy maydonini tark etgan.

Seshanba kuni esa mamlakat parlamenti vaziyat va chiqishlar chog‘ida aytilgan ayblovlarni muhokama qilish uchun yig‘ilish o‘tkazdi.

Namoyishga minglab odamlar to‘plangan, ularning aksariyati yoshlar tashkil qiladi.
Shanba kuni namoyishchilar Mo‘g‘uliston prezidentining rasmiy qarorgohiga yaqinlashmoqchi bo‘lgan, biroq politsiya ularning yo‘lini to‘sib qo‘ygan.

Dushanba kuni aksiya qayta boshlandi va huquq-tartibot idoralari bilan toʻqnashuvlarga aylanib ketdi.

Sovuqqa qaramay (Ulan-Batordagi havo harorati -21C ga tushgan), markaziy maydonda bir necha ming namoyishchilar yig‘ildi.

Ma’lumotlarga ko‘ra, namoyishchilar maydonga olib boruvchi yo‘llarni to‘sib, muz shaharchasida o‘rnatilgan somon archasini yoqib yuborishga uringan.

• Osiyo
• Xitoy
• mongoliya