Mo‘ynoq tumani Qoraqalpog‘iston markazidan qariyb 300 kilometr olisda joylashgan. Hududda aholi nisbatan kam bo‘lsa-da, ularga tibbiy yordam ko‘rsatishda doim tor soha mutaxassislariga ehtiyoj yuqori.

Shu sababli 2022-yil 17-mayda imzolangan “Tibbiyot muassasalari xodimlarini moddiy qo‘llab-quvvatlash hamda rag‘batlantirishni kuchaytirish chora-tadbirlari to‘g‘risida”gi Prezident Farmonida boshqa hududlardan Taxtako‘pir, Chimboy, Qorao‘zak, Bo‘zatov, Shumanay, Qo‘ng‘irot tumanlariga borib ishlovchi shifokorlarning har oylik lavozim maoshiga 100 foiz, Mo‘ynoq tumanida esa 200 foiz miqdorida qo‘shimcha ustama to‘lovlari to‘lab berish belgilangan.

Mo‘ynoqda 6 ta davolash-profilaktika muassasasi va 2 ta mahalla tibbiyot punkti faoliyat ko‘rsatadi. Ularda ishlaydigan soha xodimlari soni 511 nafar bo‘lib, 59 nafari shifokorlardir. Ana shu mutaxassislar orasida Prezident farmoni asosida boshqa hududlardan kelib ishlayotgan vrachlar 12 nafarni tashkil qilmoqda”, – deydi tuman tibbiyot birlashmasi boshlig‘i o‘rinbosari Jamila Davletova.

Qayd etilishicha, Mo‘ynoqda respublikaga qo‘shni Xorazm viloyatidan tortib, Samarqand, Toshkent, Farg‘ona va Andijon viloyatlaridan kelib ishlayotgan shifokorlar ham bor.

Boshqa hududdan kelib ishlayotganlar orasida pediatr, anesteziolog-reanimatolog, otolaringolog, xirurg, urolog va terapevt kabi mutaxassisliklarga ega shifokorlar bo‘lib, ular mo‘ynoqliklarga sifatli tibbiy xizmat ko‘rsatishda mahalliy shifokorlarga ko‘mak bermoqda.

• Mo'ynoq
• Qoraqalpog‘iston
• Tibbiyot