Bugun, 16-noyabr kuni “Wyndam Tashkent Hotel” mehmonxonasida Moliya Vazirligi va Jahon banki mutaxassislari ishtirokida yer munosabatlari va soliqqa tortishga bagʻishlangan konferensiya boʻlib oʻtdi.

Anjumanda yer masalalari va mulkni boshqarish sohasini modernizatsiya qilish borasida Jahon banki hamda bir qator tashkilotlar bilan hamkorlik qilish boʻyicha kelishib olindi.

Jahon Bankining yer va geofazoviy masalalar boʻyicha global rahbari Vael Zakout Xabardor.uz muxbiri bilan Oʻzbekistonda soliqqa tortish jarayoni va mulk huquqi haqida suhbatlashdi.

-Jahon banki Oʻzbekiston hukumati bilan hamkorlik qilish, xususan yer masalalari va mulkni boshqarish sohasini modernizatsiya qilishdan mamnun. Bu zamonaviy iqtisodiyotni oʻrnatishning asosidir. Agar odamlar mulklari haqida oʻzlarini xavfsiz his qilishsa, ular bizneslarini kengaytirishga harakat qilishadi.

Buning asosida esa boʻsh ish oʻrinlarini yaratiladi. Shu bilan birga mulk huquqi kafolatlansa, mulk bozori mexanizmlari ham yaxshi ishlay boshlaydi. Bu esa oʻz navbatida ishlab chiqarishni surʼatlarini oshiradi, odamlar kredit olishlari osonlashadi va tabiiyki daromad oshadi. Shuning uchun bu zamonaviy iqtisodiyot uchun asosdir.

-Hozirgi paytda Oʻzbekistonda soliqqa tortish jarayoni va yer reformalarini qanday taʼriflagan boʻlar edingiz?

-Dunyoning koʻplab mamlakatlarida mulkni soliqqa tortish tajribasi bor. Bu har bir mulkdor oʻz mulki uchun soliq toʻlash majburiyati degani. Bu jarayon hukumat tomonidan boshqariladi va kelib tushgan mablagʻlar aholi hamda iqtisodiy va ijtimoiy sohalarining rivojlanishi uchun sarflanadi.

Mulkni soliqqa tortishning eng muhim jihati bu adolatli boʻlishidir. Bu badavlatlar koʻproq va pastroq qatlamdagilarning nisbatan kamroq soliq toʻlashligidir. Shuning uchun hozirgi kunda hukumat soliq tizimini takomillashtirish uchun bozor qiymatini oʻrganishini taqozo qiladi. Bu xalqaro va zamonaviy iqtisodiyot amaliyotiga mos keladi.

• Jahon banki
• Konferensiya
• Vazirlik