Avtohalokat qurboni boʻlgan Oʻzbekiston MMA assosiatsiyasi vise-prezidenti Murod Xontoʻrayevning oʻlimi boʻyicha ochilgan jinoiy ish hodisada jinoyat tarkibi boʻlmagani uchun harakatdan tugatilgan. YTH ishtirokchisi boʻlgan “Gentra” rusumli avtomobilga yetkazilgan zarar Xontoʻrayevning “BMW” mashinasi sugʻurtasidan qoplanadi.

Toshkent viloyati IIBB axborot xizmatining maʼlum qilishicha, Toshkent viloyati IIBB huzuridagi Tergov boshqarmasi tomonidan olib borilgan dastlabki tergov harakatlari davomida Murod Xontoʻrayev amaldagi “Yoʻl harakati qoidalari”ning 3, 4, 73, 77 hamda 79-bandlari talablarini qoʻpol ravishda buzgani aniqlangan.

Unga koʻra, marhum MMA jangchisi:

- “Yoʻl harakati xavfsizligi toʻgʻrisida”gi qonun talablariga amal qilmagan;

- yoʻl harakati qatnashchilari, xususan, “Gentra” rusumli avtomashina harakatlanishiga xavf tugʻdirgan;

- oʻzi bilan bir yoʻnalishda oldinda harakatlanib ketayotgan avtomashina orqasidan hamda chap tomonlama (beton toʻsiqqa nisbatan) xavfsiz oraliq masofa saqlamagan;

- harakatlanish vaqtida aniqlay olishi imkoniyatidagi xavf yuzaga kelganda transport vositasining tezligini u toʻla toʻxtashni taʼminlaydigan darajada kamaytirishi yoki toʻsiqni boshqa harakat qatnashchilari uchun xavf tugʻdirmagan holda aylanib oʻtish choralarini koʻrmagan;

- aholi punktlaridan tashqarida yengil avtomobilga ruxsat etilgan tezlikni soatiga 100 kilometrdan oshirgani natijasida faqat oʻzi ogʻir tan jarohati olib vafot etgan.

Toshkent viloyati IIBB huzuridagi Tergov boshqarmasi xulosasiga koʻra, Murod Xontoʻrayev YTH oqibatida vafot etgani, u bilan birga boʻlgan yoki YTHning boshqa ishtirokchilariga oʻrtacha, ogʻir jarohat yetmagani hamda oʻlim holati kuzatilmagani sababli sportchining oʻzi aybdor deb topilgan. Shu munosabat bilan jinoyat ishi JPKning 83-moddasi 2-bandiga asosan harakatdan tugatilgan.

Eslatib oʻtish mumkin, Murod Xontoʻrayev 2021-yilning 19-iyul kuni oʻzining boshqaruvidagi BMW avtomobilida avtohalokatga uchrab vafot etgandi.

1987-yilda tugʻilgan Xontoʻrayev MMAdagi professional faoliyatini 2013-yilda boshlagan. “Osiyo ayigʻi” laqabi bilan mashhur boʻlgan oʻzbekistonlik sportchi jami 15 ta jang oʻtkazib, shundan 12 tasida gʻalaba qozongan, uchta jangda magʻlub boʻlgan, yana bir jang natijasi esa bekor qilingan.

• MMA
• O‘zbekiston