Ijtimoiy tarmoqlarda Namangan viloyati Norin tumanidagi 1-sonli umumiy o‘rta ta’lim maktabining 11-b sinf o‘quvchisi Murodjon Ergashaliyevga matematika fani bo‘yicha onlayn olimpiadada berilgan noutbuk maktab ma’muriyati tomonidan olib qo‘yilgani keng muhokamalarga sabab bo‘lgan edi.

Viloyat XTB mazkur holat bo‘yicha o‘rganish o‘tkazib, shu kunning o‘zida Murodjon Ergashaliyevga noutbuk qaytarib berilganini ma’lum qildi.

Shuningdek, boshqarma tomonidan Norin tuman xalq ta’limi bo‘limi hamda 1-sonli maktab faoliyati yuzasidan xizmat tekshiruvi o‘tkazilgan va Norin tumani 1-sonli maktab direktori Nozimjon Husanov hamda sinf rahbari Sanobar Xojimurodova egallab turgan lavozimidan ozod etilgan.

Bundan tashqari, yuqoridagi holat bo‘yicha, kamchiliklarga yo‘l qo‘yganligi sababli Norin tuman xalq ta’limi bo‘limi mudiri Javlonbek Nurmuxammadovdan tushuntirish xati olinib, tegishli intizomiy jazo chorasi qo‘llash bo‘yicha Xalq ta’limi vaziriga xat kiritilgan. 

• Maktab
• Namangan
• XTV