2020-yilning 26-iyun kuni davlat rahbarining Namangan viloyatiga tashrifi doirasida mahalliy rahbarlar Prezident Shavkat Mirziyoyevga qiymati 13 mlrd so‘m bo‘lgan Chortoq tumanidagi Baland adir dashtliklarida 36 gektar maydondagi har biri 2 sotixli 1000 ta issiqxona loyihasi taqdim qilingan edi.

Mazkur loyiha “Golden Nuts Namangan” agro tomorqa xizmati masʼuliyati cheklangan jamiyat hamkorligida amalga oshirilgan va unga Bandlikka ko‘maklashish jamg‘armasi hisobidan 6,7 milliard so‘m subsidiya mablag‘lari va tijorat banklarining 6,3 millard so‘mlik imtiyozli krediti yo‘naltirilgan.

Viloyat hokimligi davlat rahbariga mazkur tadbir mahalliy aholini ish bilan taʼminlash, kambag‘allikni tugatishni maqsad qilgani haqida maʼlumot bergan va unda 1000 ta yangi ish o‘rni yaratilib, “temir daftar”, “ayollar daftari” va “yoshlar daftari”da turgan fuqarolar ishga joylashtirilganini aytgan.

Maʼmuriyat mazkur tashrifdan bir yil o‘tib, issiqxonalarning qarovsiz qolib ketayotgani haqida maqola chop etgan “Ozodlik” nashriga raddiya berar ekan kelgusidashi rejalari haqida maʼlum qilgan. Unda issiqxonalardan hozirda (2021-yil iyun oyi) pomidor va bodiring ekilib, ular Rossiya eksport qilinayotgani va eksport hajmini 1,5 mln dollarni tashkil qilayotgani, kelgusida bu raqamlar 5 mln dollargacha etkazish rejalashtirilganini bildirgan.

Ammo...

Hisob palatasi hududlarda, jumladan, Namangan viloyatida oilaviy tadbirkorlikni rivojlantirish dasturiga ajratilayotgan mablag‘lardan maqsadli va samarali foydalanish yuzasidan o‘tkazilgan nazorat tadbirlari bo‘yicha xulosasini berdi.

Unga ko‘ra, ayni paytda ushbu dasturdagi muammoli kreditlar bo‘yicha Namangan viloyati birinchi o‘rinda bo‘lib, 44 foizni tashkil qilgan.

Jumladan, Palata 2020-yilda kambag‘allikni tugatishning “chortoqcha usuli” deya osmonlarga ko‘tarib maqtalgan Chortoq tumani Baland adir hududida tashkil etilgan 1 000 ta 2 sotixlik issiqxonalarning 95 foizi hozirda yaroqsiz holga kelib, ulardan foydalanilmasligi maʼlum qilindi.

Bundan ham achinarlisi esa, 2022-yilning 7-iyunidagi tuman hokimining tegishli farmoyishi bilan aynan shu “mo‘jiza loyiha” uchun yana Chortoq tuman mahalliy byudjetiga viloyat mahalliy byudjetining 2022-yil 1-choragidagi daromadlar rejasini oshirib bajarilgan qismi hisobidan 200 million so‘m mablag‘ ajratilgan.

Bu “yotib qolguncha otib qolish”mi?!

Haybarakallachilikka qachon barham beriladi?! Davlatning birinchi darajali shaxsiga chiroyli “to‘n kiydirib” taqdim qilish, alaloqibat ishlamaydigan milliardlik loyihalarni kim nazorat qiladi? Xalq pullari nega kimlarningdir naf bermaydigan “biznes”lariga tiqiladi?..

Savollar ko‘p. Javoblar esa, albatta, tegishli idoralar tomonidan olinishi va ulardan sarflangan pullarning hisobini so‘rashi kerak.

• Chortoq
• Issiqxona
• Namangan
• Prezident