Olmaota markaziga zirhli texnikalar kiritildi, harbiylar navbatchilik qilmoqda.

Kunning birinchi yarmida shahar markazidagi ayrim ko‘chalarda norozilik namoyishchilari faolligi kuzatildi. Ular markaz tomon harakatlanishgan.

Ayni vaqtda shaharda namoyishchilar va politsiya o‘rtasidagi to‘qnashuvlar qayta boshlangan. Namoyishchilar xavfsizlik kuchlarining bir nechta mashinasini qo‘lga oldi. Politsiya maxsus jihozlardan foydalandi. Shaharda jamoat transporti va savdo markazlari ishlamayapti. Taksi xizmatlari ham to‘xtagan.

Namoyishchilar Olmaota hokimligi binosini bosib olishga urinmoqda.

Aqto‘beda esa namoyishchilar mahalliy ma’muriyat binosiga bostirib kirishga harakat qilishdi.

Aqtouda namoyishchilar Qozog‘istonning boshqa viloyatlarida hibsga olinganlarning ozod qilinishini talab qilishdi.

Nur-Sultonda vaziyat birmuncha tinch ekani, do‘konlar va jamoat transporti ishlayotgani aytilmoqda.

Avvalroq, mamlakatning Nur-Sulton, Olmaota, Aqtau, Aqto‘be va boshqa shaharlarida davlat organlarining barcha binolari huquq-tartibot idoralari tomonidan kuchaytirilgan tartibda himoyaga olingani aytilgandi.

Bundan tashqari mavjud vaziyat sabab “Makat” va “Jem” poyezd bekatlarida harakat yopilgan. Shuningdek, yo‘lovchi poyezdlarining Olmaota 1, Olmaota 2, Mangistau, Atirau, Aqto‘be, Nur-Sulton stansiyalaridan Makat va Jem stansiyalari bo‘ylab harakatlanishi ham bekor qilingan.

Natijada 4-yanvardan 5-yanvarga o‘tar kechasi 14ta reys bo‘yicha poyezd yo‘lovchilari manziliga yetkazilmagan. Ayni paytda poyezdlar vaqtinchalik tutash stansiyalarda joylashtirilgan.

• Namoyish
• Qozog‘iston