“Navbahor” hamda “Nasaf” jamoalari oʻrtasidagi Oʻzbekiston Coca-Cola kubogi final uchrashuvidan (1:2) soʻng namanganliklar ustozi Samvel Babayan oʻz fikrlarini bildirdi.

“Avvalo “Nasaf”ni gʻalaba bilan qutlayman. Oʻyin teng kurashlar ostida kechdi. Bugun ulardan hech bir jabhada qolishmadik. Shunchaki, bitta gol kam urdik. Muxlislarga rahmat aytaman, uzoq yoʻlni bosib kelganiga qaramay, oxirigacha bizni qoʻllab-quvvatlab turishdi.

Futbolchilarimga ham alohida rahmat. Kubokni Namanganga olib ketish uchun bor kuchlari bilan harakat qilishdi, afsuski uddalay olmadik. Endi, chempionatning qolgan uch oʻyiniga maksimal tayorgarlik koʻramiz.

Birinchi boʻlimda raqibni ularning jarima maydoni atrofida pressing qilishga harakat qildik, ammo markazda biroz muammolar bor edi. Ikkinchi taymda buni toʻgʻirladik va ustunlik qildik.

Tarkibda jarohat olganlar yetarli edi, shu bois kichik jarohatlari bor Turopov va Yaxshiboyevni ikkinchi taymning soʻnggi daqiqalaridagina maydonga tushirdik. Bizda, zaxiradan maydonga tushib, oʻyinni kuchaytira oladigan boshqa futbolchilar yoʻq.

Murabbiy ishlaydi va shartnomasi tugaydi. Barqarorlik haqida gapirgan edim. Yil davomida qilgan ishimizni kam emas deb oʻylayman.

“Nasaf”ning ustunligi ham shunda. Barqaror va bir necha yillardan beri ishlab kelayotgan murabbiy bor. Agar biz ham sabr qilib olgʻa intilsak, bizda ham barqarorlik boʻladi.

Kecha aytganimdek, “Navbahor”da uzoq yillar davomida murabbiylar va futbolchilar almashinuvi doim kuzatilgan.

Shu bois, barqarorlik yoʻqolgan. Tabiiyki, natija ham boʻlmagan. Bugun shunchaki, omadimiz kelmadi. Barqarorlik boʻlsa, hammasi iziga tushadi.

Yana bir bor aytaman, birinchi davrada ham, ikkinchi davradan ham koʻplab oʻyinchilarni taklif etdik. Murabbiy ham, oʻyinchi ham Namanganda katta bosimni yengib oʻtishi kerak. Muxlislar tomonidan bosimni sezmadik.

Aksincha, ulardan kuch oldik. Bugun stadionda bizni qoʻllab-quvvatlab turgan muxlislar, raqib muxlislarinikidan kam boʻlsa ham, ularga rahmat aytaman.

Biz uchun uzoq yoʻl bosib kelishdi. Bugun bizning kunimiz emas ekan. Keyingi oʻyinda muxlislarni xursand qilishga harakat qilamiz”, — dedi Babayan.

• Babayan
• Fikr
• Futbol
• O‘zbekiston