Qiziltepa tumanida 16 mln. 368.000 soʻmlik pul mablagʻlarini firibgarlik yoʻli bilan qoʻlga kiritgan sobiq MIB xodimiga nisbatan sud hukmi oʻqildi. Bu haqda Oliy sud xabar berdi.

Fuqaro A.V 2017-yilning 30-iyun sanasidan 2020-yilning 1-avgustigacha Majburiy ijro byurosi Qiziltepa tuman boʻlimi inspektori vazifasida faoliyat yuritgan.

A.V xizmat vazifasida fuqarolardan energiya isteʼmoli uchun naqd pul koʻrinishida pul mablagʻlarni olish vakolati mavjud boʻlmasada, u 2018-yilning iyul oyidan 2020-yilning iyul oyiga qadar tuman hududida yashovchi 33 nafar isteʼmolchidan jami 10 mln. 187 000 soʻm miqdoridagi elektr energiyasi uchun toʻlovlarni, 21 nafar isteʼmolchidan jami 6 mln. 181 000 soʻm miqdordagi pul mablagʻlarni tabiiy gaz toʻlovi uchun qabul qilgan.

Keltirilishicha, fuqarolarni berilgan pul mablagʻlari abonent hisob raqamlariga toʻlanishini aytib, oʻzi tomonidan chakana savdodan sotib olgan toʻlov cheklariga ushbu pullarini olganligini tasdiqlagan hamda cheklarni isteʼmolchilarga berish yoʻli bilan ishontirib, ushbu pul mablagʻlarini ularning abonent hisob raqamlariga kirim qilmasdan oʻz manfaatlari yoʻlida sarflagan.

Maʼlum qilinishicha, jami 16 mln. 368.000 soʻmlik pul mablagʻlarini firibgarlik yoʻli bilan qoʻlga kiritib, pulni oʻzining shaxsiy ehtiyojlariga uchun sarflab yuborgan.

JIB Qiziltepa tuman sudining ochiq sud majlisida V.Aning jinoyat ishi koʻrib chiqilganda, sudlanuvchining chin koʻngildan pushaymonligi, oilaviy sharoiti, jinoyat ishi boʻyicha moddiy zarar toʻliq qoplanganligi eʼtiborga olinib, A.Vga Oʻzbekiston Respublikasi JK 168-moddasi 3-qismining “b” bandi bilan oylik ish haqining yigirma foizini davlat daromadi hisobiga ushlab qolgan holda 3 yil ahloq tuzatish ishlari jazosi tayinlandi.

• Sud