Amerikalik tadbirkor, Tesla kompaniyasi rahbari Ilon Mask zudlik bilan neft va gaz qazib olishni oshirishga chaqirdi. Bu haqda “RIA Novosti” xabar berdi.

“Bu haqda gapirish qiyin, lekin biz zudlik bilan neft va gaz qazib olishni oshirishimiz kerak. Favqulodda vaziyatlar favqulodda choralarni talab qiladi”, – deya yozgan Mask.

Uning ta’kidlashicha, bu “Tesla”ga ham salbiy ta’sir qiladi, ammo barqaror energiya yechimlari Rossiyadan neft va gaz eksportini qoplash uchun darhol javob bera olmaydi.

Avvalroq, YeI Rossiyadan gaz yetkazib berishni tezda qisqartirilishini ma’lum qilgan edi.

Ma’lum qilinishicha, 4-mart kuni Yevropada gaz narxi 2400 dollargacha ko‘tarildi va yana o‘zining tarixiy maksimal darajasini yangiladi. Yevropada gazning avvalgi rekord bahosi bir kun avval qayd etilgan, o‘shanda narx ming kub metr uchun 2279 dollargacha ko‘tarilgan edi.

Yevropada gaz narxi anti-Rossiya sanksiyalari, shuningdek, xorijiy kompaniyalarning Rossiya bilan qo‘shma loyihalardan chiqish haqidagi xabarlari fonida ko‘tarila boshlagan.