Prezident Shavkat Mirziyoyev Zomin texnoparkidagi birinchi investitsiya loyihalarini boshladi. Hozirda 30 ta loyiha shakllantirildi, unga Xitoy 1,2 milliard dollar sarmoya kiritadi. Bu haqda Prezident matbuot xizmati xabar berdi.

Jizzax viloyatining Zomin tumanida Xitoyning “Mingyuan” kompaniyasi bilan birgalikda “texnopark” maxsus sanoat zonasi tashkil etilmoqda. Ushbu loyiha uchun 400 gektar yer ajratilib, infratuzilmani ta’minlashning maqsadli dasturi tasdiqlangan va 160 mlrd so‘m ajratilgan.

Qayd etilishicha, xitoylik investorlar 1,2 milliard dollar sarmoya kiritadigan 30 ta loyiha allaqachon shakllangan.

Ushbu hududda yuqori qo‘shilgan qiymatli tovarlar va tashqi bozorlarda talab qilinadigan import o‘rnini bosuvchi mahsulotlar ishlab chiqaradigan korxonalar tashkil etiladi. Xususan, elektrotexnika, mashinasozlik, qurilish materiallari, mebel, oziq-ovqat sanoati va xizmat ko‘rsatish sohalarida loyihalar amalga oshiriladi.

Natijada 5 mingdan ortiq yangi ish o‘rni yaratiladi, 4,7 trillion so‘mlik sanoat mahsulotlari ishlab chiqariladi. Bundan tashqari, 70 million dollarlik eksport salohiyati yaratilishi ko‘zda tutilgan.

Shuningdek, texnopark hududida sanoat korxonalari uchun malakali mutaxassislarni tayyorlaydigan xalqaro tajriba almashish va muhandislik markazi tashkil etiladi.

Bundan tashqari, ofis markazi, turar-joy binolari, eko-Park, yirik ko‘rgazma zali va savdo markazi qurilishi ham rejalashtirilgan.

Marosimda davlat rahbari ramziy tugmani bosdi. Shuningdek, texnoparkda birinchi investitsiya loyihalari qurilishi boshlandi.

• Loyiha
• Shavkat Mirziyoyev
• Xitoy