Bugun, 5-iyun kuni Buyuk Britaniyaning nufuzli “QS Quacquarelli Symonds” xalqaro reyting agentligi dunyodagi eng yaxshi universitetlar 2025-reytingi natijalarini e’lon qildi.

Ro‘yxatda birinchi marta O‘zbekistonning birvarakayiga ikki oliy ta’lim muassasasi – Toshkent irrigatsiya va qishloq xo‘jaligini mexanizatsiyalash muhandislari instituti Milliy tadqiqot universiteti 547-o‘rinda hamda Mirzo Ulug‘bek nomidagi O‘zbekiston milliy universiteti 781–790-o‘rin bilan munosib joy egalladi.

Ushbu universitetlar xalqaro reyting agentligi metodologiyasining to‘qqiz ko‘rsatkichidan oltitasida yuqori ko‘rsatkichlarni namoyon etgan. Akademik nufuz ko‘rsatkichi bo‘yicha dunyoning eng yaxshi 300 ta oliy o‘quv yurtlari qatoriga va Markaziy Osiyodagi eng yaxshi universitetlar uchligiga kiritilgan.

Xususan, reytingning “O‘qituvchi–talaba nisbati” ko‘rsatkichi (144-o‘rin) bo‘yicha dunyoning 200 ta eng yaxshi universitetlari qatoridan joy oldi.

Ma’lumot uchun, “QS Quacquarelli Symonds” global oliy ta’lim sektori uchun xizmatlar, tadqiqot va tahlillar taqdim etuvchi dunyodagi yetakchi reyting agentligi bo‘lib, universitetlar samaradorligini qiyosiy taqqoslash orqali ma’lumotlar taqdim etuvchi dunyodagi eng mashhur manba hisoblanadi.

• OTM