Nodavlat taʼlim tashkilotlarida ham qishki taʼtil muddatini 2022-yil 24-yanvarga qadar uzaytirish maqsadga muvofiqligi taʼkidlandi.

Avval xabar berilganidek, 2022-yil 24-yanvarga qadar mamlakatimizdagi barcha umumtaʼlim maktablari pedagog-oʻqituvchilarning xalqaro standartlarga muvofiq ishlab chiqilgan Milliy oʻquv dasturlari asosida malakalarini oshirish kurslarini tashkil etish belgilangan.

Qayd etilishicha, yuqoridagilaridan kelib chiqqan holda nodavlat taʼlim tashkilotlarida ham qishki taʼtil muddatini 2022-yil 24-yanvarga qadar uzaytirish, ularning rahbar va pedagog kadrlarini xalqaro standartlarga muvofiq ishlab chiqilgan Milliy oʻquv dasturlari asosida masofaviy taʼlim shakllarini qoʻllagan holda malaka oshirish kurslariga jalb etish maqsadga muvofiq.

Oʻz navbatida, qishki taʼtil davrida oʻquvchilarga oziq-ovqat berilmasligi hamda boshqa sarf-xarajatlar qilinmasligini inobatga olgan holda ularning ota-onalaridan shu muddatlar uchun toʻlov undirilmasligi tavsiya etilgan.

Shuningdek, taʼtil davrida oʻquvchilarning boʻsh vaqtlarini mazmunli oʻtkazish maqsadida ular uchun tashkil qilinayotgan onlayn fan olimpiadalar, intellektual oʻyinlar, kitobxonlik madaniyatini rivojlantirishga qaratilgan bellashuvlar va turli tanlovlarda faol ishtirokini taʼminlash maqsadga muvofiqligi taʼkidlandi.

• Maktab
• Ta'lim