Namangan shahar “Mehribonlik” mahalla fuqarolar yigʻini hududida joylashgan 41-sonli umumtaʼlim maktabi binosida, Jinoyat ishlari boʻyicha Namangan shahar sudi tomonidan sayyor sud majlisi oʻtkazildi. 

Unda Oʻzbekiston Respublikasi Maʼmuriy javobgarlik toʻgʻrisidagi kodeksining 241-moddasida nazarda tutilgan huquqbuzarlikni sodir ota-bolaga nisbatan maʼmuriy huquqbuzarlik ishi koʻrib chiqildi.

Xususan, 2020-yilning noyabr oyidan joriy yilning sentyabr oyiga qadar Namangan shahrida istiqomat qiluvchi fuqaro I.A. va uning farzandi I.A.lar yashash xonadonida 10 dan ortiq voyaga yetmagan bolalarga, tegishli ruxsatnomasiz, noqonuniy diniy taʼlim berib kelganligi aniqlangan.

Shundan soʻng, surishtiruv organi tomonidan ota-bola harakati boʻyicha Oʻzbekiston Respublikasi Maʼmuriy javobgarlik toʻgʻrisidagi kodeksining 241-moddasi bilan hujjatlar rasmiylashtirilib, huquqbuzarlik ishi koʻrib chiqish uchun sudga taqdim qilingan.

Jinoyat ishlar boʻyicha Namangan shahar sudi raisi Baxtiyor Tavakkalov ishni atroflicha koʻrib chiqib, ota-bolaga tegishli tartibda jarima jazosi tayinlagan.

• Sud