Uzbekistan Airports matbuot xizmati 3-dekabr kuni Urganch va Nukus aeroportlarida ko‘rish imkoniyati yomonlashgani sababli samolyotlar uchish va qo‘nishni amalga oshira olmaganini ma’lum qildi.

Natijada Urganch aeroportidagi kuchli tuman tufayli “Aeroflot”ning Moskvadan parvoz qilayotgan AFL1976 reysi soat 03:25 da “Sheremetyevo”dan uchishni amalga oshirmagan.

Shuningdek, yana ikki aviaqatnov bilan ham yuqoridagi kabi holat kuzatilgan:

– S7 Airlines aviakompaniyasining Samara-Urganch yo‘nalishi bo‘yicha soat 04:35 da uchishi kerak bo‘lgan SBI6481 reysi;

– “Ural” aviakompaniyasining Sankt-Peterburgdan soat 03:30 da uchishi kerak bo‘lgan SVR2473 reysi.

Ma’lum qilinishicha, ayni vaqtda samolyotlar Urganchdagi ob-havo sharoitlari yaxshilangunga qadar jo‘natuvchi-aeroportlarda qolmoqda.

Ko‘rish masofasi 200 metrgacha qisqargan kuchli tuman, shuningdek, Nukus aeroporti faoliyatini ham cheklab qo‘ygan. Uzbekistan Airways’ning ikki reysi Toshkentga parvozini kutmoqda. Bundan tashqari, soat 11:30 da Nukus-Aqtau yo‘nalishi bo‘yicha uchishi kutilayotgan reys ham kechiktirilishi mumkin.

Uzbekistan Airways bu haqda ma’lumot berib, har ikki shahar aeroportlarida kuzatilayotgan quyuq tuman sababli avval rejalashtirilgan HY-051/052, 053/054, 011/012 reyslari vaziyat o‘zgarmaguniga qadar qoldirilishini ma’lum qildi. Uchish vaqti esa taxminan 14:00 ga rejalashtirilgan.

“2 va 3-yanvar kuni kechiktirilgan yoki qoldirilgan aviaqatnovlar yo‘lovchilari aviachipta pulini qaytarish yoki bepul boshqa sanaga o‘zgartirish imkoniyatiga egalar. Buning uchun aviachipta xarid qilingan joyga murojaat qilishlari kerak”, – deyiladi Uzbekistan Airways xabarida.

• Nukus
• Urganch
• Uzbekistan airways