Qozog‘istondagi tartibsizliklardan so‘ng Elboshi Nursulton Nazarboyevning qarindoshlari egallab turgan lavozimlaridan ozod qilinmoqda.

Jumladan, Nazarboyevning kuyovi Timur Kulibayev ham Qozog‘iston Respublikasi “Atameken” milliy tadbirkorlar palatasi Prezidiumi raisi lavozimini tark etdi.

U Milliy palata saytida lavozimidan ketishi haqida tushuntirish berib, bu o‘z qarori bilan sodir bo‘lganini aytgan.

“Qurultoy delegatlari va prezidium a’zolariga menga bildirilgan ishonch uchun minnatdorchilik bildiraman. Milliy tadbirkorlar palatasining oliy nazorat organiga sakkiz yil rahbarlik qilish men uchun katta sharaf va mas’uliyat bo‘ldi”, – deydi u.

Eslatib o‘tamiz, Timur Kuliboyev Nazarboyevning o‘rtancha qiziga uylangan.

Ma’lumot uchun, avvalroq, Elboshining ikki kuyovi – “KazTransOyl” kompaniyasi rahbari Dimash Dosanov hamda “KazGaz” kompaniyasi boshqaruvi raisi Kayrat Sharipbayevlar, shuningdek, Qozog‘iston Milliy xavfsizlik qo‘mitasi raisi o‘rinbosari Samat Abishevlar ishdan olingani xabar qilingan edi.

• Qozog‘iston