Nyu-York gubernatori Keti Xokul maymunchechak tufayli shtat bo‘ylab favqulodda holat e’lon qildi.
“Men maymunchechak epidemiyasini nazorat qilish bo‘yicha davom etayotgan sa’y-harakatlarimizni kuchaytirish uchun shtat bo‘ylab favqulodda holat e’lon qilaman. Ushbu ijro farmoni bizga tezroq javob berishga imkon beradi va tibbiyot mutaxassislariga ko‘proq Nyu-Yorkliklarni emlashga ko‘maklashish uchun qo‘shimcha choralar ko‘rish imkoniyatini beradi”,– deb yozadi Xokul Twitter sahifasida.
Uning qo‘shimcha qilishicha, AQShda maymunchechak bilan kasallangan har to‘rtdan bir fuqaro aynan Nyu-York shtatida qayd etilgan.
AQSh Kasalliklarni nazorat qilish va oldini olish markazlarining (CDC) so‘nggi ma’lumotlariga ko‘ra, mamlakatda maymunchechak bilan kasallangan 5189 ta holat aniqlangan, ulardan 1345 tasi Nyu-Yorkka to‘g‘ri keladi.
O‘tgan hafta JSST ushbu epidemiyani xalqaro ahamiyatga molik favqulodda holat deb e’lon qildi, ammo epidemiya Evropadan tashqari dunyoning barcha mintaqalari uchun o‘rtacha xavf tug‘dirishini ta’kidlangan.
Shu bilan birga, JSST dunyo mamlakatlariga maymunchechakka qarshi ommaviy emlashni tavsiya etmasligi va mavjud vaksinalar maymunchechakka qarshi qanchalik samarali ekanligi haqida hali ma’lumotlarga ega emasligini bildirgan.
Ma’lumot uchun, maymunchechak kamdan-kam uchraydigan virusli infeksiya bo‘lib, u odamlar orasida ham yuqadi. Bu odatda yengil holat bo‘lib, ko‘pchilik bir necha hafta ichida tuzalib ketadi, ammo ba’zilarida asoratlar paydo bo‘lishi mumkin. Maymunchechakning dastlabki belgilariga isitma, bosh og‘rig‘i, mushak og‘rig‘i, bel og‘rig‘i, shishgan limfa tugunlari, titroq va charchoq kiradi.
Shuningdek, ba’zi joylarda toshma paydo bo‘lishi mumkin, ko‘pincha yuzdan boshlanadi va keyin tananing boshqa qismlariga tarqaladi.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!