Axborot texnologiyalari va kommunikatsiyalarini rivojlantirish vaziri Sherzod Shermatov “O‘zbekiston telekommunikatsiya tarmoqlarini boshqarish Respublika markazi” DUK faoliyati bilan tanishuv jarayonida IMEI kodlar berishda ko‘rsatiladigan xizmatlarning murakkab va noqulay ekanligiga to‘xtaldi.

“IMEI kodlarini ro‘yxatdan o‘tkazish jarayonini isteʼmolchilar uchun yana-da osonlashtirish yo‘llarini topishimiz va unga ko‘ra, fuqarolar xizmatlardan oson va qulay foydalanish imkoniyatiga ega bo‘lishi kerak. Buning uchun barcha choralarni ko‘rish zarur”, – dedi AKT vaziri Sh. Shermatov.

Vazir shuningdek, markaz faoliyati va xodimlar uchun yaratilgan shart-sharoitlar bilan tanishdi. Markaz mutaxassislari tomonidan amalga oshirilgan ishlar, yaqin kelajakda ishga tushurilishi rejalashtirilgan loyihalar bo‘yicha taqdimot namoyish etildi. Ularning har biri bo‘yicha alohida muhokama o‘tkazilib, mavjud muammolar yechimi ko‘rib chiqildi.

Yaqin kelajakda amalga oshirilayotgan loyihalar qatorida mobil telefon raqamlarini ko‘chirish tizimi loyihasi ham borligi taʼkidlandi.

Taqdimotda soha rahbarlari o‘z taklif va mulohazalarini bildirib, bu boradagi mavjud muammolarni birgalikda o‘rganish va hal etish uchun zarurligini ham taʼkidladi.

• AKT
• Imei
• Shermatov