Bugungi videoselektor yig‘ilishida davlat rahbari joriy yilda taʼlim muassasalarini bitiruvchi yoshlarni ish bilan taʼminlash masalasiga alohida to‘xtalib o‘tdi.

“O‘quv yili deyarli yakunlandi. Oldimizda 404 ming nafar o‘rta taʼlim, 151 ming nafar kasb-hunar taʼlim, 125 ming nafar oliygoh bitiruvchilari, jami 680 ming nafar yoshlarning bandligini taʼminlash bo‘yicha muhim vazifa turibdi”, – dedi Prezident.

Shu maqsadda barcha hokimlar:

– bitiruvchilar bilan shaxsan uchrashadi;

– ijtimoiy tarmoqlar va OAV orqali uchrashuvlarning aniq vaqti, joyi va telefonlarini eʼlon qiladi;

– uchrashuvlarda rektorlar, yirik ish beruvchilar, korxona va klasterlar, mutasaddi idoralar rahbarlari ham ishtirok etadi;

– bitiruvchilarning ishga ehtiyoji, qiziqishi va ko‘nikmalarini o‘rganib, ularning balansini shakllantiradi;

– ish beruvchilarning ehtiyojidan kelib chiqib, monomarkazlarda kasbga tayyorlashni tashkil etadi.

Bu ishlarni amalga oshirish uchun joylarda doimiy ishlaydigan shtablar tuzilishi, ular ijtimoiy tarmoqlar orqali yoshlar va ularning ota-onasi bilan tizimli muloqotni yo‘lga qo‘yishi, kelib tushadigan har bir murojaat tezkor ko‘rib chiqilishi shartligi belgilandi.

• Bandlik
• Prezident
• Videoselektor
• Yoshlar