Kecha, 18-aprel kuni Sport vazirligi majlislar zalida o‘tkazilgan navbatdan tashqari konferensiyada O‘zbekiston talabalar sporti assotsiatsiyasining faoliyati ko‘rib chiqildi.

Konferensiya davomida mamlakatimizda ommaviy sportni rivojlantirish, mahoratli sportchilarni tayyorlashda talaba-sportchilarning o‘rni, oliygohlardagi mavjud sport infratuzilmasining holati tahlil etildi.

Bildirilgan fikrlar va takliflar asosida oliy ta’lim, fan va innovatsiyalar vaziri Qo‘ng‘irotboy Sharipov O‘zbekiston talabalar sporti assotsiatsiyasining raisi etib saylandi.

Aytish lozim, O‘zbekiston talabalar sporti assotsiatsiyasi 2018-yilda tashkil etilgan. O‘tgan davr mobaynida yurtimizdagi oliy ta’lim muassasalarida 26 ta olimpiya sport turi bo‘yicha 591 ta sport klubi hamda 721 ta sport to‘garaklari faoliyat yuritmoqda.

O‘zbekistonda keyingi yillarda jismoniy tarbiya va sportga davlat darajasida e’tibor qaratilishi natijasida Talabalar sport harakati yangi bosqichga ko‘tarildi. “Universiada”, “Barkamol avlod” musobaqalari bilan bir qatorda, “Talabalar ligasi”, “Besh tashabbus olimpiadasi”, “Talaba yugur” va “Rektor kubogi” kabi ommaviy musobaqalar o‘tkazilishi yo‘lga qo‘yildi.

Konferensiyada ta’kidlanganidek, bundan buyon barcha ta’lim yo‘nalishlaridagi 1-bosqich talabalari uchun 4 kreditli “Jismoniy tarbiya” fani joriy etiladi. Sport klublari va to‘garaklar faoliyatini boshqarish uchun yagona raqamli platforma va mobil ilova yaratiladi. Yagona elektron platforma orqali musobaqalar taqvimi, baholash tizimi joriy etiladi va bu “Hemis” dasturiga integratsiya qilinadi.

Oliy ta’lim muassasalarida faoliyat ko‘rsatayotgan har bir sport to‘garagi rahbarini moddiy rag‘batlantirish va talabalarga sport faolligi uchun imtiyozlar berish masalalari ham ko‘rib chiqiladi.

• Oliy ta'lim, fan va innovatsiyalar vazirligi
• Tayinlov