Keyingi yillarda shahar ham iqtisodiy, ham ijtimoiy jihatdan rivojlanib bormoqda. Yangi korxonalar, ta’lim va tibbiyot muassasalari ishga tushmoqda. Bu o‘zgarishlarning “drayveri” – Olmaliq kon-metallurgiya kombinati, deyiladi xabarda.

Mamlakatda ishlab chiqarilayotgan sanoat mahsulotining 7 foizi, eksport hajmining 15 foizi mazkur kombinat hissasiga to‘g‘ri keladi. Oxirgi yillarda ilmga va texnologiyaga katta mablag‘ yo‘naltirilgani natijasida yangi konlar topilib, ishlab chiqarish hajmi oshyotgani ta’kidlangan. 

Xususan, Prezidentining 2017-yil 1-martdagi qaroriga muvofiq, kombinatda “Yoshlik-1” konini o‘zlashtirish bo‘yicha 5 milliard 122 million dollarlik megaloyiha amalga oshirilmoqda.
Shavkat Mirziyoyev Olmaliqqa tashrifi chog‘ida, avvalo, mazkur kondagi ishlarni ko‘zdan kechirgan.

Xabarda berilishicha, kon hududi 11 ming gektar. Zaxirasi ham shunga yarasha salmoqli - yiliga 65 million tonna ma’dan qazib olish quvvatiga ega. Bu konda oltin, mis, kumush, molibden, selen kabi 13 turdagi qimmatli va nodir metallar bor. Ularni qayta ishlash uchun Olmaliq kon-metallurgiya kombinatida 3-mis boyitish fabrikasi qurilmoqda.
Shuningdek, Prezidentga shu boradagi ishlar haqida axborot berilgan.

Bu yerda ish boshlangan 2017-yilda yiliga 3 million kub metr kon ishlari bajarilgan. 415 million dollarlik 570 dan ziyod zamonaviy texnikalar olib kelingach, samaradorlik o‘n karra oshgan. Endilikda ish hajmi yiliga 40 million kub metrni tashkil etmoqda.

“Bu kon - katalizator. Uni samarali o‘zlashtirish bilan birga kichik konlar bo‘yicha ham yangi yo‘nalish qilish kerak. Bu ham qo‘shimcha ish o‘rinlari, katta eksport, degani’, - deydi Shavkat Mirziyoyev.
Loyiha doirasida, shuningdek, ohak zavodi, 650 megavattli elektr tarmog‘i va boshqa infratuzilma ob’yektlari barpo etiladi. Jami 6 ming kishi ish bilan ta’minlanadi.

Prezident ushbu kombinat, umuman, kelgusida har bir sanoat korxonasi o‘zini o‘zi muqobil elektr energiyasi bilan ta’minlashi zarurligini ta’kidlagan. Ilmiy tadqiqotlarni va maqsadli aspiranturani kengaytirish, Toshkent davlat texnika universitetining Olmaliq filiali salohiyatini oshirish bo‘yicha topshiriqlar berilgan.

• Prezident