11-aprel kuni xalqaro bozorda oltin narxi ilk bor 3 250 dollardan oshdi. Bu holat savdo urushlari va global iqtisodiyotdagi bosimlar, shuningdek, AQSh dollarining qadrsizlanishi bilan bog‘liq.

Comex birjasida iyun oyidagi fyucherslar 2,2 foizga oshib, bir unsiya uchun 3 246,2 dollarni tashkil etdi. Savdolar chog‘ida esa narx 3 255,9 dollarga yetib, tarixiy rekordni yangiladi.

Mutaxassislar so‘zlariga ko‘ra, dollarning zaiflashuvi oltin narxining o‘sishiga sabab bo‘lmoqda. DXY indeksi 2022-yildan beri eng past darajaga tushib, 1 foizga kamaygan. Trading Economics bu holatni xorijiy investorlar ishonchining pasayishi bilan izohlamoqda.

AQSh va Xitoy o‘rtasidagi bojxona tariflari bo‘yicha keskinlik global inqiroz xavfini oshirmoqda. Investorlar esa xavfsiz aktiv sifatida oltinga sarmoya kiritmoqda.

UBS tahlilchisi Jovanni Staunovoning aytishicha, yaqin oylarda oltin narxi 3 400–3 500 dollargacha yetishi mumkin. 2023-yilda 1 900 dollar bo‘lgan narx, 2025-yil aprelida ilk bor 3 250 dollardan oshdi.

• Narx-navo
• Oltin
• rekord