Maktab va OTMlarda o‘qish 24-yanvardan boshlab 1 oy muddatda onlayn shaklda davom etadi. Ushbu vaziyatda kun tartibiga chiqayotgan savollardan biri: o‘qituvchilar ish faoliyatini uyda davom ettirsalar bo‘ladimi?
Xalq ta’limi vazirligi online ta’lim jarayoni vaqtida o‘qituvchilar o‘z ish faoliyatini qay tarzda davom ettirishi haqida ma’lumot berdi.
Onlayn ta’lim jarayoni vaqtida o‘qituvchilar o‘zlarining lavozim majburiyatlari bilan bog‘liq faoliyatni amalga oshirishda davom etadilar.
Joriy yilning 24-yanvaridan boshlab, bir oy muddatda umumta’lim maktablarida o‘quv jarayonlari “onlayn” shaklda tashkil etilishi belgilangan.
Masofaviy shaklda o‘quvchilarning sifatli ta’lim olishi uchun Milliy teleradiokompaniyasi tomonidan ajratilgan telekanallari hamda “Onlayn maktab” telegram kanali orqali dars mashg‘ulotlari muntazam berib boriladi. “Onlayn maktab” loyihasi doirasida beriladigan darslar jadvali kunlik ravishda “Onlayn maktab” telegram kanali orqali e’lon qilib boriladi.
O‘qituvchilar mazkur kundalik jadval asosida dars berayotgan fanlari bo‘yicha o‘quvchilarning o‘zlashtirishini, uyga vazifalarni bajarilishini hamda o‘quvchilar bilimini sinf jurnaliga (elektron kundalik tizimi joriy etilgan maktablarda Kundalik.com tizimiga) baholab borishni ta’minlab borishlari hamda zaruriyatga ko‘ra “Onlayn maktab” loyihasi doirasida o‘tilgan mavzularni o‘quvchilarga qo‘shimcha tushuntirib borishlari lozim.
Maktab rahbarlaridan ta’lim muassasasida o‘qituvchilar faoliyatini amalga oshirishi uchun yetarli sharoitlar yaratib, AKT xonalarida uzluksiz Internet ishlashini ta’minlab berishi kerak.
Bundan tashqari, “Umumiy o‘rta ta’lim muassasalarining pedagogik mutaxassisliklari bo‘yicha namunaviy yillik ish rejasini shakllantirish tartibi to‘g‘risidagi Yo‘riqnoma”ga muvofiq, pedagog xodimlar dars mashg‘uloti (o‘quv-tarbiya jarayoni)dan tashqari, o‘quv-tarbiya jarayonining metodik ta’minoti va tashkiliy-pedagogik jarayoni bilan ham shug‘ullanishi belgilab qo‘yilgan.
Shu bois, o‘quvchilarning onlayn ta’lim jarayonlari vaqtida pedagoglar maktabda bevosita lavozim majburiyatlari hamda u bilan tuzilgan mehnat shartnomasida belgilangan vazifalar bilan bir qatorda o‘z ustida mustaqil ishlashlari lozim.
O‘z o‘rnida, Bandlik va mehnat munosabatlari vazirining “Karantinga oid choralar amal qilishi davrida xodimlarni masofaviy ish usulida, moslashuvchan ish grafigida yoki uyda ishlashga o‘tkazishning vaqtinchalik tartibi to‘g‘risidagi nizomni tasdiqlash haqida” buyrug‘i talablariga muvofiq maktabda kasallanish holatlari yuzaga kelganda, o‘qituvchilarning sog‘ligini himoyalash, koronavirusning yangi shtammining keng tarqalishini oldini olish maqsadida pedagoglarning masofadan ishlashi uchun imkoniyat beriladi.
Maktab rahbari o‘qituvchilarning mehnat faoliyatini nazorat etish va muvofiqlashtirishga mas’ul sanaladilar, deyiladi xabarda.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!