Bugun, 6-iyul kuni Neft eksport qiluvchi davlatlar tashkiloti – OPEK bosh kotibi Muhammad Barkindo vafot etdi. Bu haqida Nigeriya Milliy neft korporatsiyasi NNPC bosh direktori, mamlakatning OPEKdagi vakili Mele Kyari xabar berdi.

Qayd etilishicha, Barkindo 5-iyul kuni kechqurun 63 yoshda hayotdan koʻz yumgan. Kyari oʻlim sababi nima ekanligini aytmagan. Kuni kecha Barkindo Nigeriyada boʻlib, neft va gaz konferensiyasida nutq soʻzlagan edi.

“Biz hurmatli doktor Muhammad Sanusi Barkindoni yoʻqotdik. Albatta, bu uning yaqin oilasi, NNPC, mamlakatimiz Nigeriya, OPEK va global energetika hamjamiyati uchun katta yoʻqotish boʻldi. Dafn marosimi haqidagi maʼlumotlar tez orada eʼlon qilinadi”, – deb yozadi Kyari Twiterʼda.

Maʼlumot uchun, Barkindo 2016-yilning avgustidan beri OPEKni boshqarib kelayotgan edi. U mazkur lavozimda ikki muddat ishlagan, vakolatlari iyul oyi oxirida tugashi kerak boʻlgan. Bosh kotib lavozimiga tayinlanishidan oldin, 1986-yildan buyon tashkilotda Nigeriya vakili – avvaliga ushbu mamlakat delegatsiyasi aʼzosi, soʻngra Nigeriyaning rasmiy vakili sifatida ishlagan.

Yanvar oyida OPEK vazirlari Quvaytning tashkilotdagi vakili Xaytham Al-Gaysni Barkindoning vorisi etib saylagan edi. U 1-avgustdan boshlab uch yil muddatga bosh kotib lavozimini egallashi maʼlum qilingan.

• Jahon
• Nigeriya