Ijtimoiy tarmoqlarda Farg‘ona viloyatining Qo‘shtepa tumanidagi maktablardan birida o‘qituvchidan gap eshitgan o‘quvchi qiz oynadan sakrab chiqib ketgani aks etgan video tarqaldi.

Tarqatilgan baʼzi xabarlarda o‘quvchi qizni maktabning ikkinchi qavatidan o‘zini tashladi, degan izohlar ham uchragan edi.

Farg‘ona viloyat xalq taʼlimi boshqarmasi mazkur holat yuzasidan rasmiy maʼlumot berdi. Qayd etilishicha, mazkur holat haqiqatda Qo‘shtepa tumanidagi 22-maktabda bo‘lib o‘tganligi aniqlangan.

Maʼlum bo‘lishicha, holat joriy yilning 23-may kuni ushbu maktabning birinchi qavatida joylashgan kimyo fani sinfxonasida bo‘lgan.

Maktabning 8-sinf o‘quvchisi A.A. dars paytida kalitni uyiga tashlab kelish uchun ruxsat so‘ragan.  O‘qituvchi dars tugashiga 5 daqiqa qolganini bildirgan. Biroq o‘quvchi muallima gapiga quloq solmasdan derazadan sakrab, qochib ketgan.

Shundan so‘ng o‘qituvchi uni qayta sinfxonaga olib kirib tanbeh bergan, biroq o‘quvchi qiz yana derazadan qochib ketgan.

Shu holat A.A. ning sinifdoshi tomonidan telefonda tasvirga olinib tarqatilgan. O‘quvchi A.A. sog‘-salomat hech qanday tan jarohati olmaganligi maʼlum qilindi.

Mazkur xabar viloyat xalq taʼlimi boshqarmasi rahbariyati tomonidan nazoratga olingan.

• Farg‘ona
• Maktab
• O‘quvchi
• XTV