Kecha, 10-fevral kuni Olmaliqdagi maktabda o‘quvchi qiz “tarbiyaviy” suhbatdan so‘ng vafot etgani haqida xabarlar tarqalgandi. Toshkent viloyati IIBB axborot xizmati rahbari Bobur To‘laganov qiz yig‘ilishga kirmasidan oldin vafot etganini ma’lum qildi. “Nemolchi.uz” kanali e’lon qilgan xabarda 10-sinf o‘quvchisining o‘limiga maktabda o‘tkazilgan “tarbiyaviy” suhbat sabab bo‘lgani, suhbat ichki ishlar xodimlari ishtirokida o‘tgani qayd etilgandi. Toshkent viloyati maktabgacha va maktab ta’limi boshqarmasi voqea 28-yanvar kuni Olmaliq shahridagi 5-sonli maktabda sodir bo‘lganini bildirib, ayni paytda huquq tartibot organlari tomonidan surishtiruv ishlari olib borilayotganini ma’lum qilgandi. Bobur To‘laganov e’lon qilgan axborotga ko‘ra, 9, 10 va 11-sinf o‘quvchi qizlari bir-birlari haqidagi turli xil mish-mishlar tarqatilishi natijasida o‘zaro kelisha olmay yurgan. Ushbu holat yuzasidan maktab ma’muriyati, Xotin-qizlar qo‘mitasi vakillari va ichki ishlar organlarining aynan ushbu maktabga biriktirilgan inspektor-psixologlari ishtirokida o‘quvchi qizlar uchun tarbiyaviy soat yig‘ilishi o‘tkazilishi rejalashtirilgan.

Maktabning 10-sinf o‘quvchisi bo‘lgan marhuma boshqa o‘quvchilar qatori aynan ushbu yig‘ilishga kelayotgan vaqtida birinchi qavat yo‘lagida o‘zini yomon his qilgan va yerga yiqilib, vafot etgan.

“E’tibor bering, o‘quvchi hali rejalashtirilgan yig‘ilishga kirishidan avval ushbu voqea sodir bo‘lgan. Ijtimoiy tarmoqlarda esa tanqidiy tarbiyaviy soatdan so‘ng maktab o‘quvchisi vafot etgani haqidagi xabarlar tarqatilmoqda”, – deydi viloyat IIBB axborot xizmati rahbari.

​Shuningdek, Bobur To‘laganov hozirda mazkur holat yuzasidan vakolatli organlar tomonidan tergov harakatlari olib borilayotganligini, rasman tasdiqlanmagan xabarlarni tarqatmaslikni so‘ragan.

• IIBB
• Maktab
• O‘quvchi
• Toshkent viloyati