Orenburg shahrida so‘nggi bir kun ichida yana 800 ta uy va 1,8 ming fermer xo‘jaligi tomorqasini suv bosdi. Shaharda jami 3 mingta uy va 8 mingta xo‘jalik tomorqasi suv ostida qoldi, deb xabar berdi “Kazinform”. 

Bu haqda jurnalistlarga shahar dispetcherlik markazi direktori Aleksandr Sisa ma’lum qildi.

Agentlik ma’lumotlariga ko‘ra, Orenburgning Ural daryosi uchastkasida suv Belyayevskaya ko‘chasiga yetib kelgan va u yerdagi o‘tish joyi yopilgan. Ushbu ko‘cha hududidagi ombor va do‘konlarni suv bosib, xususiy sektorga yetib kelgan.

Shuningdek, Belyayevskaya ko‘chasidagi “Medik” bog‘dorchilik shirkati suv ostida qolgan. Bog‘dorchilik jamiyati va Belyayevskaya ko‘chalari orasidagi bo‘sh joy suv ostida qolgan. Orenburgning bu qismiga markazdan va boshqa kichik hududlardan hozir faqat Orenburg tumani hududidan o‘tuvchi halqa yo‘li bo‘ylab borish mumkin.

Viloyat hokimligi matbuot xizmatining xabar berishicha, 13-aprel holatiga ko‘ra, 25 bog‘dorchilik kooperativi, Zarechniy, “Grand Park” kichik tumanlari, Kuznechniy, Kuybishev, “Dubki” turar-joy majmualari gazdan uzilgan. 64 bog‘dorchilik kooperativi, Kuznechniy tumani, boshqa bir qator qishloq va tumanlar, ko‘chalar elektr energiyasiz qolgan. Shafeyev ko‘chasidagi “Orentrikotaj” qozonxonasi uskunaning suv bosishi sababli o‘chirilgan.

Eslatib o‘tamiz, Orenburg viloyatida suv toshqinlari Ural daryosi bo‘ylab quyilib, qator aholi punktlarini, jumladan, Qozog‘istonni suv bosishi xavfini tug‘dirmoqda.