O‘zbekistonda 2021-yilda 7490 turdagi 1 million 578 ming 500 o‘ram dori vositasi va tibbiy buyum ekspertizadan o‘tkazilgan. Bu haqida Sog‘liqni saqlash vazirligi axborot xizmati xabar berdi.

Ma’lum qilinishicha, Sog‘liqni saqlash vazirligi huzuridagi Farmasevtika tarmog‘ini rivojlantirish agentligining Dori vositalari, tibbiy buyumlar va tibbiy texnika ekspertizasi, standartlashtirish markazi tomonidan sifatsiz, kontrafakt, yaroqlilik muddati tugagan farmasevtik mahsulotlarni aniqlash hamda ekspertizadan o‘tkazish bo‘yicha qator ishlar amalga oshirilgan.

Qayd etilishicha, 2021-yil markazga kelgan murojaatlarga ko‘ra, 7490 turdagi 1 million 578 ming 500 o‘ram dori vositasi va tibbiy buyum ekspertizadan o‘tkazilgan. Natijada:
1618 turdagi 72 ming 774 o‘ram dori vositasi yorliqlash bo‘yicha me’yoriy hujjatlar talabiga mos kelmasligi (kontrafakt);

- 24 turdagi 13 785 o‘ram qalbakilashtirilgan dori bir necha marotaba takrorlangani;
- 396 turdagi 2794 o‘ram dori vositasi va tibbiy buyumlarning yaroqlilik muddati tugagani;
- 2578 turdagi 709 ming 347 o‘ram dori davlat ro‘yxatidan o‘tmagani;
- 2874 turdagi 779 ming 800 o‘ram dori vositasining muvofiqlik sertifikati mavjud emasligi aniqlangan va qonuniy chora ko‘rilishi uchun huquqni muhofaza qilish organlariga taqdim qilingan.

Bundan tashqari, “‘Dori vositalari va farmasevtika faoliyati to‘g‘risida’gi qonuning 20-moddasiga muvofiq, sifatsiz, qalbakilashtirilgan, mamlakatda ro‘yxatdan o‘tkazilmagan dori vositasi va tibbiy buyumlarni hamda ro‘yxatdan o‘tkazilgan dori vositalarining g‘ayriqonuniy nusxalarini xarid qilish, chakana realizatsiya qilish, foydalanish taqiqlanadi”, deya eslatib o‘tiladi Sog‘liqni saqlash vazirligi ma’lumotida.

• Dori
• SSV