Oʻzbekiston va Turkmaniston oʻrtasida avtomobil transportida xalqaro yuk tashuvlarini amalga oshirish uchun "Olot" chegara oʻtkazish punktiga qoʻshimcha ravishda “Xoʻjayli” va “Shovot” chegara oʻtkazish punktlari faoliyati qayta tiklanadi.

Transport vazirligi Matbuot xizmati xabariga koʻra, joriy yilning 18-noyabr kuni transport va logistika masalalari boʻyicha oʻzbek turkman ishchi guruhining uchrashuvi boʻlib oʻtgan.

Mazkur uchrashuvda “Xoʻjayli – Kunya-Urgench” hamda “Shovot – Dashoguz” chegara oʻtkazish punktlari ish faoliyati xalqaro yuk tashishlar uchun neytral zonada tirkama va yarim tirkamalarni kontaktsiz almashish yoʻli orqali tashkil etish boʻyicha sinov oʻtkazilgan.

Xabarda aytilishicha, hozirda Transport vazirligi, Davlat bojxona qoʻmitasi hamda DXX chegara qoʻshinlari “Xoʻjayli – Kunya-Urgench”, “Shovot – Dashoguz” oʻtkazish punktlari ish faoliyatini joriy yil 26 noyabrdan sanitariya-epidemiologiya tadbirlariga qatʼiy rioya etgan holda neytral zonada tirkama va yarim tirkamalarni kontaktsiz almashish yoʻli bilan qayta tiklash yuzasidan Turkmanistonnnig tegishli vazirlik va idoralari bilan hamkorlikdagi sayʼi-harakatlarni davom ettirmoqda.

Eslatib oʻtamiz, mazkur chegara oʻtkazish punktlari koronavirus pandemiyasi sabab amaliyotga joriy etilgan cheklov choralari natijasida 2020-yilda yopilgan edi.

• Chegara
• O‘zbekiston
• Turkmaniston