O‘zbekiston Turizm va sport vazirligi joriy yil mamlakatimizda turizm biznesini qo‘llab-quvvatlash uchun davlat byudjetidan qancha mablag‘ yo‘naltirilganini ma’lum qildi.

Qayd etilishicha, koronavirus bilan bogʻliq cheklovlarga qaramay, Oʻzbekiston sayyohlik industriyasi nafaqat oyoqqa turib olishga, balki rivojlanishga ham muvaffaq boʻlgan.

“O‘zbekistonni dunyoda pandemiyadan eng koʻp jabr koʻrgan hududlardan biri ekanligini hisobga olsak, yurtimizda 260 ming ish oʻrni, 1400 sayyohlik tashkiloti va 105 ta yangi mehmonxona yaratildi. 9 oy davomida turizm biznesini qoʻllab-quvvatlash uchun 6,5 milliard soʻm mablag‘ yoʻnaltirildi”, - deydi Turizm va sport vazirining birinchi oʻrinbosari Ulugʻbek Aʼzamov.

Vazirlik maʼlumotlariga koʻra, 9 oy davomida Oʻzbekistonga 1,2 million xorijiy sayyoh tashrif buyurgan, turizm xizmatlaridan tushgan foyda esa 273 million dollarni tashkil etadi.

Keltirilishicha, bu yil Gʻarbiy Yevropa, Amerika hamda MDHning ayrim davlatlaridan kutilganidan koʻproq sayyohlar tashrif buyurgan. 2021-yilda umumiy qiymati qariyb 2 trillion so‘mlik 38 ta loyihaning ishga tushirilishi natijasida turizm sohasida 3 mingga yaqin yangi ish o‘rni yaratildi.

Shuningdek, turizm sohasida istiqbolli startap loyihalar hamda innovatsion biznes g‘oyalarni maqsad qiluvchi “Innovatsiyalar sari yo‘l” tanlovi g‘oliblariga umumiy qiymati 1,5 milliard so‘mlik grantlar topshirilgan.

• Investitsiya