O‘zbekiston aeroportlarida 15-yanvardan boshlab koronavirusga majburiy test topshirish joriy etiladi. Bu haqda “Uzbekistan Airports” xabar berdi.

Maxsus komissiya qaroriga ko‘ra, majburiy test topshirish faqat O‘zbekistonga kelganlarga tegishli. COVID-19’ga qarshi kurashish bo‘yicha Respublika maxsus komissiyasining 2022 yil 11 yanvardagi bayonnomasiga asosan O‘zbekistonda koronavirus infeksiyasining aniqlangan holatlari ko‘payishi va “omikron” shtami qayd etilgani uchun mamlakatda karantin choralarini kuchaytirish to‘g‘risida qaror qabul qilingan.

Shuningdek, 15-yanvardan boshlab Davlat bojxona qo‘mitasi Sanitariya-epidemiologiya osoyishtaligi xizmati bilan birgalikda O‘zbekistondagi barcha xalqaro aeroportlarning uchib kelish zallarida ekspress-test punktlarini tashkil etadi. Kelgan barcha fuqarolar koronavirus uchun ekspress-test topshirishi kerak. Test sinovidan o‘tish qiymati O‘zbekiston Respublikasi Markaziy banki kursi bo‘yicha so‘m ekvivalentida 5 AQSh dollari miqdorida belgilanadi. Talabalik guvohnomasi bo‘lgan talabalarga 50 foiz chegirma berilsa, I va II guruh nogironlari test sinovlarini bepul topshiradi. Ikki yoshgacha bo‘lgan bolalarning test topshirishi shart emas.

“Maxsus komissiya qaroriga ko‘ra, O‘zbekistonga kelganlarning barchasi aeroportlarda majburiy ekspress-testdan o‘tkaziladi. Test Davlat bojxona qo‘mitasining markaziy laboratoriyasi tomonidan olib boriladi. Barcha aeroportlarda buning uchun maxsus zonalar mavjud, kuchlanish uchun to‘siqlar o‘rnatilgan, to‘lovlarni qabul qilish uchun terminallar, naqd pul olish uchun bankomatlar va valyuta ayirboshlash punktlari mavjud. Aeroportlar imkoniyatlaridan kelib chiqqan holda, test topshirish zonalari pasport nazoratidan o‘tishdan oldin yoki o‘tgandan keyin tashkil etiladi”, – deydi “Uzbekistan Airports” AJ boshqaruvi raisining birinchi o‘rinbosari Javlon Umarxo‘jayev.

To‘lovni amalga oshirib, kvitansiyani olgan yo‘lovchi to‘g‘ridan-to‘g‘ri test topshirishga yuboriladi, shundan so‘ng pasportga shtrix-kod yopishtiriladi. Natijalarni olish uchun taxminan 15 daqiqa vaqt ketadi. Bu vaqt ichida yo‘lovchi yukini olib, bojxona nazoratidan o‘tishga ulgurishi mumkin.

Terminaldan chiqishda shtrix-kod skanerdan o‘tkaziladi va yo‘lovchi tezkor koronavirus testi natijasini oladi. Agar test ijobiy natija bergan bo‘lsa, yo‘lovchi izolyatsiyaga yuborilishi kerak.

• Uzbekistan_Airports
• koronavirus