“O‘zbekiston milliy elektr tarmoqlari” korxonasida Afg‘onistonning DABS kompaniyasi delegatsiyasi ishtirokida “500 kilovattli Surxon–Puli-Xumri” investitsiya loyihasi masalalari muhokama qilingan. Bu haqida korxona matbuot xizmati xabar berdi.

Ma’lum qilinishicha, 2021-yilning 25–30 dekabr kunlari Da Afghanistan Breshna Sherkat kompaniyasining bosh direktori Hofiz Muhammad Amin Foruqiy boshchiligida Afg‘oniston delegatsiyasi “O‘zbekiston milliy elektr tarmoqlari” aksiyadorlik jamiyatiga tashrif buyurgan.

Qayd etilishicha, delegatsiya tashrifidan maqsad Afg‘oniston hududida “500 kilovattli Surxon–Puli-Xumri elektr uzatish tarmog‘i qurilishi” investitsiya loyihasini amalga oshirish doirasida muzokaralar o‘tkazishdan iborat. Loyiha O‘zbekiston Prezidentining 2018-yil 18-fevraldagi qarori asosida amalga oshirilmoqda.

Ta’kidlanishicha, loyiha Osiyo taraqqiyot bankining grant mablag‘lari hisobidan moliyalashtiriladi. Elektr uzatish tarmog‘ining umumiy uzunligi 245,6 kilometrni tashkil etadi.

Ushbu loyihaning asosiy maqsadi Afg‘oniston bilan qo‘shnichilik munosabatlarni yaxshilash, Afg‘oniston iqtisodiyoti rivojlanishiga, xalqining turmush farovonligini oshirishga hissa qo‘shishdan iborat. Shuningdek, Afg‘onistonga elektr energiya eksportini oshirish hamda Afg‘oniston energetika tizimini O‘zbekiston va Markaziy Osiyo energetika tizimiga ulash uchun texnik sharoitlar yaratish ko‘zda tutilgan.

Yuqori kuchlanishli elektr tarmog‘ini qurish loyihasi doirasida O‘zbekiston tomonidan — “O‘zbekiston milliy elektr tarmoqlari” korxonasining o‘z mablag‘lari hisobidan 500 kilovatt kuchlanishli “Surxon” podstansiyasidan o‘zbek-afg‘on chegarasi (Amudaryo daryosi)gacha 45 kilometr uzunlikdagi 500 kilovatt elektr uzatish tarmog‘i qurib bitkazilgan. Afg‘oniston hududida loyihaning 201 kilometr uzunlikdagi qismining qurilish-montaj ishlari amalga oshirilishi rejalashtirilgan.

• Afg‘oniston
• O‘zbekiston