O‘zbekiston va Afg‘oniston 2022-yilda elektr energiyasi yetkazib berish bo‘yicha 100 million AQSh dollarlik shartnoma imzoladi, deya ma’lum qildi Afg‘onistonning Da Afghanistan Breshna Sherkat (DABS) davlat energetika kompaniyasi.

Shartnoma O‘zbekiston Milliy elektr tarmoqlari rahbari Dadajon Isaqulov va Afg‘oniston kompaniyasi bosh ijrochi direktori Hafiz Muhammad Amin tomonidan imzolangan.

Shartnoma qiymati 100 million AQSh dollarga yaqin bo‘lib, uning doirasida Afg‘onistonga 2 milliard kVt/soat elektr yetkazib berilishi kutilmoqda.

Shuningdek, tomonlar o‘tgan yili imzolangan “Surxon – Puli Xumri” elektr uzatish liniyasini qurish loyihasini ham muhokama qilgan.

Afg‘oniston tomoni O‘zbekiston bilan to‘xtatilgan loyihalar bo‘yicha hamkorlik qilishga va’da bergan va to‘xtatilgan loyihalar xavfsizligini ta’minlashga tayyorligini bildirib o‘tgan.

• Afg‘oniston
• Elektr energiyasi