Joriy yilda oʻtgan yilga nisbatan 2,3 barobar koʻp miqdorda banan import qilingan. Bu haqda EastFruit xabar berdi.

Manbaning maʼlum qilishicha, mazkur koʻrsatkich 2020-yildagi import hajmidan 60 foizga, 2019-yilga nisbatan esa 37 foizga koʻp, yaʼni, 2020-yilda import hajmi 25,5 ming tonnani, jami 2020-yilda 36,7 ming tonnani tashkil qilgan.

Keltirilishicha, Oʻzbekiston oxirgi 10 oy ichida import qilgan banan miqdori 58,6 ming tonnani tashkil etgan boʻlib, shundan 98,6 foizi mamlakatga asosiy banan yetkazib beruvchi Ekvador Respublikasiga tegishli.

Qayd etilishicha, 2020-yilda COVID-19 pandemiyasi 2019-yilga nisbatan import oʻsish tendensiyasini 14 foizga kamaytirgan. Bunga Xitoydan keltirilgan bananlar haqidagi asossiz mish-mishlar sabab boʻldi va isteʼmol koʻrsatkichiga salbiy taʼsir koʻrsatdi.

Keyinchalik, 2021-yilda bananlarning sifati haqidagi mish-mishlarning yoʻqolishi, hoʻl meva va sabzavotlarga nisbatan banan narxining arzonlashishi, shu bilan birga supermarketlarning koʻpayishi isteʼmolchilar sonini oshishiga sabab boʻlgan.

Qolaversa, Oʻzbekiston hukumatining 2021-yil 7-oktyabrdagi bir qator mevalar, jumladan, banan importini bojxona toʻlovlaridan ozod qilish toʻgʻrisidagi qarorini inobatga olib, 2021-yil yakunida umumiy yillik import hajmi yanada oshishi mumkinligi aytilgan.

Shuningdek, bojxona toʻlovlarining bekor qilinishi, sitrus mevalar ulgurji narxining sezilarli darajada pasayishiga olib kelgan. Xususan, 2021-yilning 5-19-noyabr kunlari bananning oʻrtacha ulgurji narxi 16 foizga pasaygan va hozirgi koʻrsatkich 2021-yil yanvar oyida qayd etilgan eng past darajaga yetgan.

• Import
• Meva
• O‘zbekiston