O‘zbekistonda kreativ industriya parklari endi hududlarda ham barpo etiladi. Bu haqda 14-fevral kuni Shavkat Mirziyoyevning yoshlar bilan muloqoti davomida ma’lum qilingan.

Prezident endi kreativ industriya parklari hududlarda ham barpo etilishini aytdi. Ular zarur resurs va infratuzilma bilan ta’minlanadi.

Yoshlar bilan muloqot davomida ma’lum qilinishicha, kreativ industriya parki rezidentlariga 2030-yil yakunigacha imtiyozli soliq rejimi joriy etiladi. Bunda ijtimoiy va daromad soliq stavkalari 50 foizga kamaytiriladi, rezidentlar tovarlarni realizatsiya qilish hajmidan qat’i nazar aylanmadan olinadigan soliq to‘lovchilar bo‘ladi.

Parklar negizida kreativ soha vakillarini o‘qitadigan biznes maktablari tashkil qilinadi. Ushbu maktablarda yoshlar yangi va zamonaviy biznes yuritish hamda elektron tijorat kabi xizmat ko‘rsatishning innovatsion usullarini o‘rganadi.

Mamlakatda kreativ iqtisodiyot jadal rivojlanayotgan bo‘lib, sohada faoliyat ko‘rsatayotganlarning 98 foizini yoshlar tashkil etadi. Kreativ sanoat parklarini rivojlantirish uchun 2024-yilda 10 million dollar yo‘naltirilgan.

Prezident 2023-yilda yoshlar o‘rtasida IT, reklama, kino, arxitektura, dizayn, marketing, hunarmandchilik, rassomchilik kabi yo‘nalishlarga qiziqish ortib borayotganini hisobga olib, viloyat hokimlariga bittadan kreativ park tashkil etishni topshirgan edi.

Avvalroq, Toshkent shahridagi “Yoshlar ijod saroyi”da namunaviy kreativ park tashkil qilingan edi.

• Qaror
• Shavkat Mirziyoyev
• Yangilik