O‘zbekistonda noyabr oyidagi sabzining narxini 2021-yil iyun oyi bilan taqqoslaganda 4-5 barobargacha tushgan. 

20-iyun holatiga ko‘ra, 1 kg sabzining o‘rtacha chakana narxi 6000-10000 so‘mni tashkil etgan bo‘lsa, bugungi kunda (2021-yil oktyabr-noyabr) 2000 so‘mgacha tushdi, dalaning o‘zidagi o‘rtacha xarid narxi esa 1 kg sabzi uchun 1000-1500 so‘m atrofida baholanmoqda.

Qishloq xo‘jaligi vazirligi sabzining narxi 2022-yil bahorida kutiladigan yangi hosilga qadar shu darajada saqlanib qolishini prognoz qildi.

Qayd etilishicha, 2021-yili barcha toifa xo‘jaliklarida sabzi jami 124,4 ming gektar (o‘tgan yilga qaraganda, 18,2 ming gektarga ko‘p) maydonda ekildi. 2021-yilda yetishtirilgan 2 mln tonnadan ortiq hosildan (o‘rim-yig‘im ishlari davom etyapti) asosiy qismi ichki bozor ehtiyojlarini qondirishga yo‘naltirilgan.

Qishloq xo‘jaligi vazirligi bergan ma’lumotga ko‘ra, 2021-yili 7,6 mln AQSH dollariga teng sabzi mahsuloti 9 davlatga eksport qilingan. Mahsulot asosan Qozog‘iston, Qirg‘iziston va Rossiyaga shuningdek, Tojikiston, Belarus, Chexiya, Ukraina, Koreya Respublikasi va BAA davlatlariga yetkazib berilgan.

Ma’lumot uchun, O‘zbekiston aholisining sabzi mahsulotiga bo‘lgan yillik ehtiyoji 700-800 ming tonnani tashkil etadi. 

• Narx-navo
• Qishloq
• Vazirlik