Kecha, 31-mart kuni O‘zbekistonning Misrdagi Favqulodda va Muxtor elchisi Mansurbek Qilichev Misr prezidenti Abdulfattoh As-Sisiyga ishonch yorliqlarini topshirdi.

Tantanali tadbir Qohiradagi “Al-Ittihodiya” prezident saroyida bo‘lib o‘tdi.

Qayd etilishicha, ishonch yorliqlarini topshirish marosimida faxriy qorovul saf tortgan. O‘zbekiston elchisi sharafiga O‘zbekiston madhiyasi yangradi.

Shuningdek, qisqa suhbat chog‘ida Misr rahbari Prezident Shavkat Mirziyoyevga o‘zining samimiy salomi va ezgu tilaklarini yo‘llab, Misr tomoni O‘zbekiston bilan barcha sohalarda do‘stlik va hamkorlik munosabatlarini yanada rivojlantirish hamda mustahkamlash istagini yana bir bor bildirgan.

Xabarda keltirilishicha, O‘zbekiston va Misr o‘rtasidagi hamkorlikni yanada mustahkamlash, shuningdek, Misr prezidentining 2018-yil 4–5-sentyabr kunlari mamlakatga rasmiy tashrifi chog‘ida oliy darajadagi muzokaralarda erishilgan kelishuvlarni amalga oshirish yuzasidan fikr almashilgan. 

• Elchixona
• Misr
• Prezident
• Shavkat Mirziyoyev