Shavkat Mirziyoyev 9-may – Xotira va qadrlash kuni munosabati bilan Mudofaa vazirligining Markaziy harbiy klinik gospitaliga borib, urush qatnashchilari holidan xabar oldi. Bu haqda Prezident matbuot kotibi xabar berdi.

Qayd etilishicha, ushbu muassasaga Uskan ota Xadjimanov Boyovut tumanidan, Fayzulla ota Nurmatov Oqqo‘rg‘on tumanidan, Anarboy ota Jalilov Parkent tumanidan, Muhiddin ota Dusanbayev O‘rtachirchiq tumanidan kelib davolanmoqda.

Nuroniylar prezidentga nevara-chevaralarining o‘qish va ishlari, yutuqlari haqida so‘zlab bergan. Bobolar o‘zbekistonliklarni tinchlikning qadriga yetish, vatanparvarlik, mehnatsevarlikka da’vat etdi.

“Hamma harakatlarimiz xalqimizni rozi qilish uchun. Islohotlar natijasi eng quyiga, har bir xonadonga kirib borishini istaymiz. Rejalarimiz ham katta. Hamma jipslashsa, birgalikda harakat qilsa, o‘ylagan niyatlarimizga tezroq yetishamiz. Sizdek nuroniylarning duolari bunda bizga madadkor bo‘ladi. Sizlarning hayotingiz iroda, jasorat maktabi, gaplaringiz yoshlarga ibrat”, dedi Shavkat Mirziyoyev.

Otaxonlar mehr-e’tibor uchun davlat rahbariga minnatdorlik bildirdi. Dunyoning tinchligi, yoshlarning porloq kelajagini so‘rab duo qildi.

Gospital mukammal ta’mirlanib va yangi binolar qurilib, 2022-yil foydalanishga topshirilgan edi. Muassasa jami 700 o‘ringa mo‘ljallangan bo‘lib, bu yerda harbiy xizmatchilar, ularning oila a’zolari, soha faxriylari bepul davolanadi. Buning uchun 286 xil diagnostik tekshiruv, 600 dan ortiq amaliyotlar yo‘lga qo‘yilgan, 30 ga yaqin ixtisoslashgan bo‘limlar tashkil etilgan.

• 9-may
• Prezident