2022-yil 7-yanvar kuni Oliy Majlis Qonunchilik palatasi Spikerining birinchi o‘rinbosari Akmal Saidov Germaniya Federativ Respublikasining O‘zbekistondagi Favqulodda va muxtor elchisi Tilo Klinner bilan uchrashdi.

Muloqot avvalida A.Saidov T.Klinnerni elchi etib tayinlangani bilan qutlab, mas’uliyatli va sharafli diplomatik missiyani amalga oshirishida unga muvaffaqiyat tilagan.

Mehmonga O‘zbekistonda keyingi yillarda barcha sohada amalga oshirilayotgan keng ko‘lamli islohotlar xususida batafsil ma’lumot berilgan. Shuningdek, Oliy Majlisning qonunchilik faoliyati, norma ijodkorligi, fraksiyalar, qo‘mitalar va komissiyalar ish uslublari hamda parlamentarizm sohasidagi yangiliklar haqida axborotlar taqdim etilgan.

Xabarda keltirilishicha, uchrashuvda ikki mamlakat parlamentlari o‘rtasida hamkorlikni rivojlantirish, parlamentlar qoshidagi ilmiy-tadqiqot institutlari o‘rtasida aloqalarni o‘rnatish masalalari muhokama qilingan.

O‘z navbatida Tilo Klinner samimiy qabul uchun minnatdorlik bildirib, O‘zbekiston-Germaniya aloqalari xususan, parlamentlararo munosabatlarni yangi bosqichga olib chiqishda bor imkoniyatini ishga solishini aytib o‘tgan.

Muloqot yakunida O‘zbekiston va Germaniya o‘rtasidagi hamkorlikni rivojlantirish, parlamentlararo aloqalarni yangi bosqichga olib chiqish bo‘yicha aniq takliflar bildirildi, deb xabar beradi O‘zbekiston Respublikasi Oliy Majlis Qonunchilik palatasi matbuot xizmati.

• Germaniya
• Oliy Majlis
• O‘zbekiston