"O‘zgidromet" xizmati joriy yilning oktabr oyida respublika bo‘ylab qanday ob-havo kuzatilishini e‘lon qildi. Bu yilning oktabr oyi ham quruq va biroz iliq ob-havo bilan boshlanadi. Yomg‘irlar birinchi o‘n kunlikning oxirida, shuningdek ikkinchi va uchinchi o‘n kunliklarning ayrim kunlarida kutilmoqda.

Respublika hududining katta qismida sentabr oyida yomg‘ir umuman yog‘madi yoki biroz yog‘ishi kuzatildi. Havo harorati 27-32° atrofida, janubda ayrim kunlarda 35-39° gacha bo‘ldi.

Bu yilning oktabr oyi ham shunday quruq va biroz iliq ob-havo bilan boshlanadi.

Oyning birinchi haftasida asosan yog‘ingarchiliksiz ob-havo bo‘lishi kutilmoqda. Kechasi va ertalab havo harorati 11-16° atrofida bo‘lgan salqinlik his etiladi. Kunduz kunlari quyosh nurlari havoni 23-28° gacha, janubda ba’zi joylarda 30° gacha isitadi.

Keyinchalik oyning oxirigacha respublika hududi bo‘yicha harorat kechalari 10-15° iliqdan 3-8° iliqgacha, kunduz kunlari 23-28° dan 13-18° gacha o‘zgarib turishi kutilmoqda. Qoraqalpog‘iston Respublikasi, Xorazm viloyatida va Navoiy viloyatining shimolida oyning ikkinchi yarmida kechasi va ertalab havoda kuzgi sovuq va tuproqda 0-3° sovuqgcha kuzatilishi mumkin. Bunday harorat oktabr oyining iqlimiy me’yoriga yaqindir.

Oktabr oyida yomg‘irlar birinchi o‘n kunlikning oxirida, shuningdek ikkinchi va uchinchi o‘n kunliklarning ayrim kunlarida kutilmoqda.

Iqlimiy me’yorlarga ko‘ra, O‘zbekiston hududining katta qismida yog‘ingarchilik oktabr oyida 4 kundan 8 kungacha, respublikaning eng chekka janubida 1 kundan 3 kungacha kuzatiladi. Yog‘ingarchilik asosan yomg‘ir ko‘rinishida bo‘ladi, ammo havoda keskin sovuq kuzatilganda yomg‘ir qisqa muddatga qorga aylanishi istisno qilinmaydi.

Tungi havo haroratining o‘rtacha ko‘p yillik qiymati 6-11° iliqni tashkil etadi, lekin ko‘pincha oktabrda, ayniqsa oyning ikkinchi yarmida birinchi kuzgi sovuqlar kuzatiladi.

Oktabr oyida kunduzgi harorat odatda 23-28° iliqdan 10-15° iliqgacha o‘zgarib turadi.

Toshkent uchun oktabr oyida minimal harorat rekordi 11,2° sovuqni tashkil etadi, ammo bu juda uzoq vaqt oldin, o‘tgan asrning boshlarida bo‘lgan. Oxirgi 30 yil ichida Toshkentda minimal harorat 1-2° sovuqdan pastga tushmadi.

So‘nggi 30 yil ichida O‘zbekistonning barcha hududi bo‘yicha 2015-yilning oktabr oyi eng yomg‘ir ko‘p yog‘gan yil bo‘ldi. Ushbu yilda Toshkentda oktabr oyida yog‘ingarchilik miqdori me’yoridan 3,5 marta ko‘p bo‘ldi.

• Ob-havo
• Toshkent